जुगार अड्ड्यावर छापा; साडेचार लाखाची रक्‍कम हस्‍तगत

धुळे : स्थानिक गुन्हा अन्वेषण विभागाच्या पथकाने अचानक छापा टाकल्यानंतर जुगार अड्ड्यावरील जुगार खेळणाऱ्या झुगारूनचे चांगलेच धाबे दणाणले आहे. (dhule-news-crime-news-police-Raids-on-gambling-dens-Receiving)

शिंदखेडा तालुक्यातील दोंडाईचा शहादा रस्त्यावर हॉटेल द्वारका पासून पाचशे ते सहाशे मीटर अंतरावर एका शेतात पत्र्याच्या शेडमध्ये जुगार अड्डा सुरू असल्याची माहिती स्थानिक गुन्हा अन्वेषण विभागाच्या पथकाला मिळाली होती. या माहितीच्या आधारे स्थानिक गुन्हा अन्वेषण विभागाच्या पथकाने माहिती मिळालेल्या ठिकाणी छापा टाकला असता या ठिकाणी मोठ्या संख्येने जुगारी एकत्र जमून जुगार खेळत असल्याचे पोलिसांना आढळून आले. पोलिसांनी तात्काळ ठिकाणाहून चार जणांना ताब्यात घेतले आहे. तसेच सदर ठिकाणाहून साडेचार लाखांच्या रोख रक्कमेसह मुद्देमाल पोलिसांनी हस्तगत केला. तब्बल अकरा जणांवर विविध कलमान्वये दोंडाईचा पोलीस ठाण्यात गुन्हा दाखल करण्यात आला आहे.

धाबे दणाणले

कोरोनाच्या संकट काळात जमावबंदी असताना देखील अशा पद्धतीने बेजबाबदारपणे एकत्र जमून जुगार खेळणाऱ्या अड्ड्यावर स्थानिक गुन्हे अन्वेषण विभागाच्या पथकाने छापा टाकल्यानंतर जिल्ह्यातील इतर झुगारूनचे चांगलेच धाबे दणाणले आहेत.