आमदारांचे निलंबन..जयकुमार रावल समर्थकांकडून रास्ता रोको

भूषण अहिरे

धुळे : ओबीसी प्रश्नांवर आक्रमक झालेल्‍या भाजपच्या बारा आमदारांचे वर्षभरासाठी निलंबन केले. या आमदारांमध्‍ये शिंदखेड्याचे आमदार जयकुमार रावल यांचा देखील समावेश असून त्‍यांच्या समर्थकांनी भास्कर जाधव यांच्या प्रतिमेला जोडे मारो आंदोलन करीत धुळे– शिंदखेडा रस्त्यावर काही काळ रास्ता रोको करण्यात आला. (dhule-news-bjp-mla-dismiss-vidhanparishad-jaykumar-rawal-suporters-road-block)

पावसाळी अधिवेशाला सुरवात झाली असून, अधिवेशनाच्‍या पहिल्‍या दिवशी भाजप आमदारांनी ओबीसी आरक्षणाचा मुद्दा मांडयला सुरवात केली. विधानसभेत विरोधी पक्षनेते देवेंद्र फडणवीस यांना ओबीसी बाजू मांडू न दिल्यामुळे आक्रमक झालेल्या भाजपच्या बारा आमदारांचे निलंबन करण्यात आले. हे निलंबन एक वर्षासाठी आहे. या निलंबनामुळे ठिकठिकाणी पडसाद उमटत आहेत.

भाजप कार्यकर्ते आक्रमक

निलंबित बारा आमदारांमध्ये शिंदखेड्याचे आमदार जयकुमार रावल यांचा देखील समावेश आहे. त्यामुळे शिंदखेडा तालुका भारतीय जनता पक्षाच्यावतीने धुळे शिंदखेडा बाभळे फाट्यावर शिवसेनेचे आमदार भास्कर जाधव यांच्या प्रतिमेला जोडे मारो आंदोलन करण्यात आले. तसेच काही काळ या ठिकाणी रास्ता रोको देखील भाजपचा कार्यकर्त्यांतर्फे करण्यात आला आहे. तसेच यावेळी ठाकरे सरकार विरोधात घोषणा बाजी देखील करण्यात आली.