![Crime News](http://media.assettype.com/saamtv%2F2021-06%2Ffc254800-be19-435a-ab06-6838879675fc%2Fcrime_Sence.jpg?w=480&auto=format%2Ccompress&fit=max)
भूषण अहिरे
धुळे तालुक्यातील गरताड गाव परिसरात राहणाऱ्या एका शेतकऱ्याचे घर फोडून दागिने व रोख रक्कम ठेवलेले कपाटच चोरट्यांनी पळविण्याचा प्रकार उघडकीस आला आहे. दरम्यान हे कपाट गरताड परिसरातील नरव्हाड गावाकडे जाणाऱ्या रस्त्यावर सापडले असून, चोरट्यांनी रोख रक्कम आणि दागिने घेवून पोबारा केला आहे.
चोरी करण्यासाठी चोरटे विविध शल्लक लढवतात. वस्तू कशी चोरावी? चोरी करताना आपल्याला कोणी पकडेल का? अशा पद्धतीचे अनेक प्रश्न या चोरट्यांच्या मनात येत असतात. त्यामुळे या सगळ्यातून सावरत मोठ्या चलाखीने ते चोरी करतात. आता देखील चोरीची अशिच एक अतरंगी घटना धुळ्यात घडलीये. चोरट्यांनी फक्त दागिने नाही तर आख्ख कपाट उचलून पळ काढला आहे.
पोलिसांनी दिलेल्या माहितीनुसार, धुळे शहरापासून काही किलोमीटर अंतरावर असलेल्या गरताड गाव परिसरात एका शेतकऱ्याच्या घरी धाडसी चोरी झाल्याची घटना सकाळी सात वाजेच्या सुमारास उघडकीस आली आहे. शेतकरी नंदलाल वामन पाटील हे आपल्या परिवारासोबत घराला कुलूप लावून धाब्यावर झोपले असता चोरट्यांनी ही संधी साधून या बंद घराचा कडीकोयंडा तोडून घरात शिरकाव केला.
त्यानंतर घरातील लोखंडी कपाटच चोरट्यांनी पळविले आहे. हे कपाट नरव्हाड गावाकडे जाणाऱ्या रस्त्यावर पोलिसांना आढळून आलं आहे. त्या ठिकाणी कपाट तोडून कपाटातून अंदाजे वीस हजार रुपये रोकड दोन तोळेसोन्याचे दागिने, दहा ग्रॅम चांदीचे दागिने असा मुद्देमाल चोरट्यांनी लंपास केलाय.
सदर घटनेची माहिती मिळताच मोहाडी पोलीस ठाण्याचे पोलीस पथक त्याचबरोबर श्वान पथक, ठसे तज्ञांना पाचारण करण्यात आले होते. या घरफोडीमुळे गरताड गाव परिसरात एकच खळबळ उडाली असून पुढील तपास मोहाडी पोलीस ठाण्याचे पोलीस अधिकारी करत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.