Laxman Hake News : देवेंद्र फडणवीस मुख्यमंत्री व्हायला फक्त ब्राह्मण म्हणून विरोध का?; लक्ष्मण हाके यांचा सवाल

बालाजी सुरवसे 

धाराशिव : देवेंद्र फडणवीस यांच्यातील क्षमता पहा. ते ब्राह्मण आहेत म्हणून त्यांच्या मुख्यमंत्री पदाला विरोध का? असा सवाल ओबीसी नेते प्रा. लक्ष्मण हाके यांनी केला. तुळजापूर येथे झालेल्या प्रचार सभेनंतर माध्यमांशी संवाद साधताना हाके बोलत होते. 

धाराशिव (Dharashiv) जिल्ह्यातील तुळजापूर विधानसभा मतदारसंघाच्या वंचित बहुजन आघाडीचा उमेदवार डॉ. स्नेहा सोनकाटे यांच्या प्रचारासाठी प्रा. लक्ष्मण हाके (Laxman Hake) यांची बेंबळी येथे प्रचार सभा पार पडली. या सभेनंतर माध्यमांशी ते बोलत होते. प्रा. हाके यांनी सकाळीच ओबीसींचा महायुतीला पाठींबा राहणार असल्याचा दावा केला होता. यानंतर फडणवीस यांच्या मुख्यमंत्री पदाच्या क्षमतेवर बोलत महायुतीलाच पाठींबा असल्याचे स्पष्ट केले आहे. 

दरम्यान जिथे वंचितचा उमेदवार नाही. ओबीसी आरक्षणाच्या विचाराचा उमेदवार नाही, तिथे एक वेळेस भाजपला मतदान करू. मात्र शरद पवारांच्या तुतारीला मतदान नाही; असेही त्यांनी स्पष्ट केले. लोकसभा निवडणुकीमध्ये शरद पवारांनी मनोज जरांगे यांच्या आंदोलनाला पाठिंबा दिला आणि त्यांचं आंदोलन मोठं केल्याचे हाके म्हणाले. महाराष्ट्रात ओबीसीचे २५ आमदार सत्तेत असतील, असा विश्वास देखील त्यांनी व्यक्त केला.