Ashadhi Ekadashi : कुंथलगिरीचा प्रसिद्ध पेढा वाढवणार वारकऱ्यांच्या तोंडाची गोडी; आषाढीनिमित्त धाराशिव जिल्ह्यातून जाणार १० टन पेढा

बालाजी सुरवसे 
धाराशिव : आषाढी एकादशीनिमित्ताने पंढरपूरमध्ये राज्यभरातून भाविक दाखल होत आहेत. येथे आलेल्या भाविकांसाठी मंदिर समितीकडून लाडू बनविण्याचे काम सुरु असून आता कुंथलगिरीचा प्रसिद्ध पेढा वारकऱ्यांच्या तोंडाची गोडी वाढवणार आहे. त्या अनुषंगाने पेढे बनविण्याचे काम रात्रंदिवस सुरु आहे. 

धाराशिव (Dharashiv News) जिल्ह्यातील भूम तालुक्यातील कुंथलगिरीचा पेढा राज्यातच नव्हे तर जगभर प्रसिद्ध आहे. यंदा पहिल्यांदाच आषाढी वारीच्या निमित्ताने कुंथगिरीतील हा जगप्रसिद्ध केला पंढरीला (Pandharpur) जाणार आहे. दहा हजार किलो अर्थात दहा टन वजनाचा पेढा प्रसाद म्हणून वारकऱ्यांना मिळणार आहे. यासाठी भूम शहरातील विनोद जोगदंड यांच्या खवा क्लस्टरमध्ये हा पेढा तयार करण्याचे काम युद्धपातळीवर सुरू आहे. आषाढीच्यापूर्वी हा पेढा तयार करून पंढरपूरमध्ये पाठविण्यात येणार आहे. 

सौर उर्जेवर बनविला जातोय पेढा 

हायजेनिक आणि उच्च क्वालिटीचा हा पेढा बनवण्यासाठी विशेष मेहनत घेतली जात आहे. यासाठी वीस ते पंचवीस कामगार अहोरात्र मेहनत घेत आहेत. पेढ्याच्या गुणवत्तेचा दर्जा अधिक वाढावा यासाठी सौर उर्जेवर हा पेढा बनवला जातो आहे. येत्या दोन दिवसात दहा टन पेढा बनवून तो पंढरपूरमध्ये पाठवून भाविकांना दिला जाणार आहे.