प्रेम प्रकरणातून बेदम मारहाण, १४ दिवस मृत्यूशी झुंज, माऊलीचा करुण अंत; आई-वडिलांचा मन हेलावणारा आक्रोश

सोलापूर : धाराशिव जिल्ह्यात प्रेम प्रकरणातून मारहाण झालेल्या १८ वर्षीय तरुणाची अखेर मृत्यूशी झुंज संपली आहे. या तरुणाला प्रेम प्रकरणातून बेदम मारहाण झाली होती. या तरुणाचं नाव माऊली गिरी असं असून त्याचा उपचारादरम्यान मृत्यू झाला आहे. गेल्या काही दिवसांपासून सोलापुरातील खासगी रुग्णालयात या तरुणावर १४ दिवस उपचार सुरु होते.

माऊलीला प्रेम प्रकरणातून बेदम मारहाण झाली होती. मारहाणीनंतर तो शुद्धीवरच नसल्याचं त्याच्या आई-वडिलांनी सांगितलं. संबंधित सर्व आरोपींना फाशीची शिक्षा द्या, अशी मागणी माऊलीच्या आई-वडिलांनी केली आहे. या सर्व प्रकरणाची धाराशिव जिल्ह्यातील आंबे पोलीस ठाण्यात नोंद करण्यात आली होती. या तरुणाला सोलापुरातील खासगी हॉस्पिटल मृत्यू झाल्यानंतर नातेवाईकांनी गर्दी केली आहे.

नेमकं प्रकरण काय?

धाराशिव जिल्ह्यातील भूम इथे १८ वर्षीय तरुणाला लोखंडी रॉड, काठीने अमानुष पद्धतीने मारहाण करण्यात आली होती. मारहाणीनंतर तरुणाला मृत समजून भूम तालुक्यातील पांढरेवाडी शिवारात विवस्त्र अवस्थेत फेकून देण्यात आलं होतं. सात ते आठ जणांच्या टोळक्याकडून मारहाण करण्यात आली होती. पाठीपासून तळपायापर्यंत बेदम मारहाण करण्यात आली होती. गुप्तांगालाही तीक्ष्ण वस्तूने इजा केल्याची माहिती देण्यात आली आहे. तरुण मृत झाल्याचं समजून रस्त्यालगत विवस्त्र अवस्थेत फेकून दिलं होतं.

मारहाणीत गंभीर जखमी झालेल्या तरुणाची मृत्यूशी झुंज आज संपली. मुख्य आरोपी सतीश जगतापसह सात जणांविरोधात अंबी पोलीस स्टेशनमध्ये गुन्हा दाखल करण्यात आला आहे. या प्रकरणी तिघांना अटक करण्यात आली आहे. तर इतर आरोपी फरार आहेत. प्रेम प्रकरणातून ही मारहाण झाल्याची माहिती देण्यात आली आहे.