Fact Check : अयोध्येतील राम मंदिरामुळे लोकसभेत पराभव? शिर्डीच्या माजी खासदारांच्या VIRAL व्हिडीओमागचं सत्य आलं समोर

सचिन बनसोडे - अहमदनगर

अयोध्येतील राम मंदिरामुळे लोकसभा निवडणुकीत पराभव झाला, असा धक्कादायक निष्कर्ष शिवेसना शिंदे गटाचे शिर्डीचे माजी खासदार सदाशिव लोखंडे यांनी मांडल्याचा व्हिडीओ समाज माध्यमांवर व्हायरल झाला आहे. या व्हायरल व्हिडीओ मागचं सत्य काय? यात किती तथ्य आहे हे या बातमीतून जाणून घेऊ.

सदाशिव लोखंडे त्यांच्या व्हायरल झालेल्या व्हिडीओत मतदारसंघात रावणाला मानणारे बरेच आहेत, असं विधान करताना ते दिसतायत. दरम्यान या वक्तव्यावरून वादंग निर्माण झाल्यानंतर सदाशिव लोखंडे यांनी, माझ्या विधानाचा विपर्यास केल्याचा दावा केलाय.

शिर्डी लोकसभा मतदारसंघात सदाशिव लोखंडे यांचा पराभव झाला. जय -पराजयाची कारणमिमांसा करताना मी कोणाला दोषी मानत नाही. या निवडणुकीत माझे प्रयत्न कमी पडले, असं अगोदर लोखंडे यांनी म्हंटलं होतं.

मात्र अहमदनगर जिल्ह्यातील कर्जत येथे माध्यमांशी अनौपचारिक संवाद साधताना त्यांनी केलेल्या दाव्यावरून वादंग निर्माण झाले आहे. मतदारसंघात अकोले हा आदिवासी पट्टा आहे आणि तिथे रावणाला मानणारे बरेच आहेत. याशिवाय मतदारसंघात कारखानदाराचे गट -तट आणि साम्राज्य आहे. त्यांच्यातील वर्चस्ववादाच्या लढाईत माझा पराभव झाल्याचे विधान करताना सदाशिव लोखंडे व्हायरल व्हिडीओत दिसत आहेत.

मात्र या व्हायरल व्हिडिओवर लोखंडे यांनी माझ्या विधानाचा विपर्यास करण्यात आला आहे, असं म्हटलंय. तसेच निवडणुकीत माझे प्रयत्न कमी पडले, असं देखील त्यांनी या आधीच म्हंटलं होतं.