'अहिंसेच्या मार्गाला जास्त महत्व देतो,पण...'; चंद्रकांत पाटील यांच्यावरील शाईफेकीनंतर काँग्रेसची पहिली प्रतिक्रिया

Nana Patole News : भाजप नेते, मंत्री चंद्रकांत पाटील यांच्यावर शाईफेक झाल्यानंतर राजकीय वातावरण चांगलंच तापलं आहे. 'चंद्रकांत पाटील यांच्यावरील शाईफेकीच आम्ही समर्थन करत नाही. आम्ही अहिंसेच्या मार्गाला जास्त महत्व देतो. पण सातत्याने असं वक्तव्य करत भाजपनं एक षडयंत्र उभं केलं आहे. याच स्पष्टीकरण दिलं तरी लोक ते आता मान्य करणार नाही, अशी प्रतिक्रिया काँग्रेसचे प्रदेशाध्यक्ष नाना पटोले यांनी दिली आहे. (Latest marathi News)

नाना पटोले यांनी प्रसार माध्यामांशी संवाद साधला. त्यावेळी नाना पटोले यांनी चंद्रकांत पाटील यांच्या शाईफेकीवर प्रतिक्रिया दिली. पटोले पुढे म्हणाले, 'चंद्रकांत पाटील यांच्या वक्तव्याततून पेशवाई मानसिकता दिसून आली आहे. वैचारीक आणि पुरोगामी महाराष्ट्राची ओळख भाजपने संपवली आहे. ते पहिले बोलतात आणि नंतरच विपर्यास केला असे म्हणणे चालणार नाही, अशी प्रतिक्रिया नाना पटोले यांनी दिली.

दरम्यान, चंद्रकांत पाटील (Chandrakant Patil) यांच्या शाईफेकीनंतर राज्यातील कायदा सुव्यवस्थेवरून पटोले यांनी उपमुख्यमंत्र्यांवर टीका केली. नाना पटोले म्हणाले, ' राज्यातील कायदा सुव्यवस्थेची जबाबदारी सरकारची आहे. पण सरकारचेच मंत्री आमदार हे कायदा सुव्यवस्था बिघडवत आहे, असाही टोला हा पटोले यांनी लगावला.

'राज्याचे गृहमंत्री जर त्याला पाठिंबा देत असेल तर हे निंदनीय आहे, अशीही टीका नाना पटोले यांनी उपमुख्यमंत्री देवेंद्र फडणवीस यांच्यावर केली.

शिंदे सरकारमधील मंत्र्यांच्या वादग्रस्त वक्तव्यावर भाष्य करताना पटोले पुढे म्हणाले, 'आरोप करण्याचा कॉन्ट्रॅक्ट भाजपला दिला आहे. भाजपचे वाचाळवीर हे स्वातंत्र्यवीर असल्यासारखे वागत आहेत. त्यांच्यावर वक्तव्य करणे हा काँग्रेसचा विचार नाही'.

'जनतेचा आणि काँग्रेस प्रशिक्षणाचा संयम आता तुटत चालला आहे. निषेध करणं ठीक आहे, पण शाई फेकच समर्थन करत नाही, पण मंत्र्यावर कायदा सुव्यवस्था राहिली की नाही असा प्रश्न आता उपस्थित होत आहे, असेही पटोले म्हणाले.