भाजपची जनआशीर्वाद यात्रा पेट्रोलचे भाव दुप्पट करण्यासाठी आहे का?

जालना : भाजपची जनआशीर्वाद यात्रा पेट्रोल, डिझेलचे भाववाढ दुप्पट करायला आहे का.? असा खरमरीत सवाल काँग्रेसचे प्रदेशाध्यक्ष नाना पटोले यांनी उपस्थित केला आहे. भाजपने लोकांना फसवलं आता कशाच्या बळावर तुम्ही जन आशीर्वाद यात्रा काढलाय असंही त्यांनी म्हटलंय.

हे देखील पहा -

आज पटोले यांचा जालन्यात जिल्हा काँग्रेस कमिटीच्या वतीने सत्कार करण्यात आला. यावेळी त्यांनी प्रसारमाध्यमांशी संवाद साधला. लोकांना खोटं बोलून भाजपने सत्ता मिळवली आणि महागाई वाढवली आहे. ओबीसी समाजाची जातीनिहाय जनगणना करावी ही काँग्रेसची जुनी मागणी असून मी विधानसभा अध्यक्ष असताना अध्यक्षाच्या खुर्चीवर बसून ओबीसींची जातीनिहाय जनगणना करण्याचा ठराव विधानसभेत पारीत केला होता, असंही त्यांनी स्पष्ट केलं.

ओबीसी आरक्षण जाण्याला राज्य सरकार जबाबदार असल्याचा आरोप देवेंद्र फडणवीस यांनी केलाय. यावर बोलताना, फडणवीस सरकारने ओबीसींना फसवण्याचं काम केलं असा पलटवार नाना पटोले यांनी केला. अमर,अकबर अँथनीचं हे सरकार आपापसातील भांडणातून पडेल असं रावसाहेब दानवे यांनी म्हटलंय यावर बोलताना अमर,अकबर अँथनी या तिघांनी लोकांना न्याय दिला म्हणून तो सिनेमा हिट झाला. आम्हीही लोकांना न्याय देण्याचं काम करत असून केंद्र सरकारच पाण्यात डूबणार असल्याचं पटोले म्हणाले.

Edited By : Krushnarav Sathe