Sambhajinagar : संभाजीनगरमध्ये मोठी कारवाई! मृत व्यक्तीच्या घराची झाडाझडती घेतली, पोलिसांनी दार उघडला, आतील दृश्य बघून हादरले

छत्रपती संभाजीनगरमधून मोठी बातमी समोर आली आहे. शहरातील मिटमिटा भागात गुन्हे शाखेने मोठी कारवाई करत एका घरातून तब्बल ५ कोटी २६ लाख २९ हजार ५६० रुपयांची रोख रक्कम जप्त केली आहे. तसेच मोठ्या प्रमाणावर गावठी आणि विदेशी अग्निशस्त्रे, जिवंत काडतुसे आणि धारदार शस्त्रांचा प्रचंड साठा जप्त केला आहे. याशिवाय या घरातून लाखो रुपयांचे सोने-चांदीचे दागिने आणि विदेशी दारूही जप्त करण्यात आली आहे. या घटनेमुळे संपूर्ण जिल्ह्यात मोठी खळबळ उडाली असून पोलीस विभागातही चर्चेला उधाण आले आहे. या प्रकरणी पोलीस ठाण्यात शिलाबाई बाबाफर्जान दोरडी हिच्याविरुद्ध शस्त्र अधिनियम, महाराष्ट्र पोलीस अधिनियम आणि महाराष्ट्र दारूबंदी अधिनियमांतर्गत विविध कलमांनुसार गुन्हा दाखल करण्यात आला आहे.

मिळालेल्या माहितीनुसार, मिटमिटा परिसरातील रहिवासी बाबा फर्जन यांच्या घरात मोठ्या प्रमाणावर रोख रक्कम, शस्त्रे आणि दारूचा अवैध साठा असल्याची गोपनीय माहिती गुन्हे शाखेला मिळाली होती. बाबा फर्जन यांचे १३ जून २०२६ रोजी निधन झाले आहे. या माहितीच्या आधारे गुन्हे शाखेच्या पथकाने संबंधित घरावर छापा टाकला. पोलिसांनी छापा टाकताच धक्कादायक चित्र पाहायला मिळालं.

पोलिसांनी तपासणीदरम्यान घरातील कपाटांचे लॉक तोडून पाहणी केली. यावेळी प्लास्टिकच्या पिशव्यांमध्ये भरून ठेवलेल्या कोट्यवधी रुपयांच्या नोटा, रिव्हॉल्व्हर, पिस्तुले, रायफल्स आणि विविध प्रकारची धारदार शस्त्रे आढळून आली. एवढ्या मोठ्या प्रमाणातील रोख रक्कम आणि शस्त्रसाठा पाहून पोलीस अधिकारीही काही काळ चकित झाले.

कारवाईत ५ कोटी २६ लाख २९ हजार ५६० रुपयांची रोख रक्कम जप्त करण्यात आली. याशिवाय १ रिव्हॉल्व्हर, २ पिस्तुले, ४ रायफल्स, ४ मॅगझिन आणि ६३२ जिवंत काडतुसे हस्तगत करण्यात आली. तसेच सुमारे १५१ ग्रॅम सोन्याचे दागिने, ३.९ किलोपेक्षा अधिक चांदीचे दागिने व शिक्के, विविध प्रकारची धारदार शस्त्रे आणि विदेशी दारूही जप्त करण्यात आली आहे. या प्रकरणाचा अधिक तपास पोलीस करत असून एवढी मोठी रोख रक्कम आणि शस्त्रसाठा कुठून आला, याचा शोध घेण्यासाठी विविध यंत्रणा तपासात सहभागी झाल्या आहेत.