Sambhajinagar : बड्या अधिकाऱ्याला लाच घेताना रंगेहाथ पकडलं, संभाजीनगरमधील धक्कादायक घटना

छत्रपती संभाजी नगर जिल्ह्यातल्या बिडकीन शासकीय रुग्णालयात मोफत होणाऱ्या कुटुंब नियोजन शस्त्रक्रियेसाठी लाच मागितल्याचा धक्कादायक प्रकार उघडकीस आला आहे. लाचलुचपत प्रतिबंधक विभागाने सापळा रचून वैद्यकीय अधीक्षक डॉ. विजय बजरंग दळवी (वय ५८) व सफाई कर्मचारी नारायण हरिश्चंद्र ब्राह्मणे (वय ३७) यांना ताब्यात घेतले आहे.

मिळालेल्या माहितीनुसार, तक्रादाराच्या बहिणीच्या कुटुंब नियोजन शस्त्रक्रियेसाठी ५ एप्रिल रोजी ग्रामीण रुग्णालय बिडकीन येथे संपर्क साधण्यात आला होता. यावेळी संबंधित शस्त्रक्रिया शासकीय योजनेतून मोफत असतानाही डॉ. दळवी यांनी सुरुवातीला तब्बल ६ हजार रुपयांची लाच मागितल्याचा आरोप आहे. लाच देण्यास नकार देत तक्रारदाराने ६ एप्रिल रोजी लाचलुचपत प्रतिबंधक विभाग, छत्रपती संभाजीनगर येथे तक्रार दाखल केली.

तक्रारीची पडताळणी पंचासमक्ष करण्यात आली असता, डॉ. दळवी यांनी १२०० रुपयांवर ‘तडजोड’ करत ही रक्कम त्यांच्या वतीने सफाई कर्मचारी नारायण ब्राह्मणे याच्याकडे देण्यास सांगितल्याचे निष्पन्न झाले. यानंतर पथकाने नियोजनबद्ध सापळा रचला.

तक्रारदाराकडून देण्यात आलेली १२०० रुपयांची लाच स्वीकारताना नारायण ब्राह्मणे याला रंगेहाथ पकडण्यात आले. त्यानंतर मुख्य आरोपी डॉ. दळवी यांनाही शोधून ताब्यात घेण्यात आले. विशेष म्हणजे वैद्यकीय अधिक्षक डॉ.विजय दळवी यांना निवृत्ती करिता फक्त ०३ महिने कालावधी राहिला होता. या घटनेने खळबळ उडाली आहे.