Chhatrapati Sambhaji Nagar: महापालिकेच्या कचरा गाडीची दुचाकीला धडक; MGM कॉलेजच्या विद्यार्थ्याचा जागीच मृत्यू

नवनीत तापाडिया, साम टीव्ही

Chhatrapati Sambhaji Nagar Accident News: छत्रपती संभाजीनगर शहरातून एक भयानक घटना समोर आली आहे. कॉलेजला जातो म्हणून तरुण हसत खेळत घराबाहेर पडला. दुचाकीवरुन तो कॉलेजला जाण्यासाठी निघाला. मात्र, वाटेतच्या त्याला महापालिकेच्या कचरा गाडीने जोरदार धडक दिली. या धडकेत तरुणाचा दुर्देवी अंत झाला आहे. शहरातील सेंट्रल नाका परिसरात ही घटना घडली.

ओमकार लक्ष्मण थोरात असे मृ विद्यार्थ्याचे नाव असून, तो एमजीएम विद्यापीठामध्ये द्वितीय वर्षात शिक्षण घेत होता. मिळालेल्या माहितीनुसार, नेहमीप्रमाणे ओंकार हा कॉलेजला जाण्यासाठी दुचाकीवरून निघाला. शहरातील सेंट्रल नाका चौकात तो आला असता, विरुद्ध दिशेने येणाऱ्या महापालिकेच्या कचरा गाडीने त्याला जोरदार धडक दिली.

ही धडक इतकी भीषण होती की, कचरा गाडीने ओंकारला दुचाकीसह २० ते ३० फूट फरफट नेलं. या भीषण अपघातात ओंकारच्या डोक्यावरून कचरा गाडीचे चाक गेल्याने त्याचा जागीच मृत्यू झाला. ओंकारच्या अचानक निघून जाण्याने त्याच्या कुटुंबावर दु:खाचा डोंगर कोसळला आहे. या घटनेनं परिसरातून हळहळ व्यक्त होत आहे.

Edited by - Satish Daud