Tadoba Tiger Reserve: आनंदाची बातमी! ताडोबा पर्यटकांच्या सेवेत, आताच करा जंगल सफारीची प्लॅनिंग

संजय तुमराम, चंद्रपूर

ताडोबाची सफर करण्याची इच्छा असणाऱ्यांसाठी आनंदाची बातमी आहे. आताच तुम्ही ताडोबा जंगल सफारीची प्लॅनिंग करा. कारण आजपासून ताडोबा पर्यटकांच्या सेवेत आला आहे. पावसाळ्यामुळे गेल्या ३ महिन्यांपासून ताडोबा जंगल सफारी बंद होती. पण आजपासून ताडोबा -अंधारी वाघ्र प्रकल्प पर्यटकांसाठी खुला करण्यात आला आहे. पहिल्याच दिवशी पर्यटकांचा उदंड प्रतिसाद मिळत आहे.

तीन महिन्यांच्या विश्रांतीनंतर आजपासून ताडोबा गाभा क्षेत्र पर्यटकांसाठी खुले करण्यात आले आहे. पहिल्याच दिवशी पर्यटकांनी भरभरून प्रतिसाद दिला. १ जुलैपासून ताडोबाचे गाभा क्षेत्र दरवर्षीप्रमाणे ३० सप्टेंबरपर्यंत म्हणजे पावसाळ्याचे तीन महिने बंद ठेवले जाते. या काळात बफर क्षेत्र मात्र सुरू असते. आज सकाळी सहा वाजता ताडोबा गाभा क्षेत्रामध्ये पर्यटकांचे स्वागत करत त्यांना प्रवेश देण्यात आला.

ताडोबा हे जागतिक दर्जाचे पर्यटनस्थळ असून पट्टेदार वाघांचे नंदनवन मानले जाते. त्यामुळे देश-विदेशातून पर्यटक मोठ्या संख्येने याठिकाणी जंगल सफारी करण्यासाठी येत असतात. पुढच्या महिनाभराची बुकिंग आधीच फुल्ल झाली आहे. यावरून तुम्हाला ताडोबाची लोकप्रियता सहज लक्षात येईल.

आज क्षेत्र संचालक जितेंद्र रामगावकर यांनी मोहर्ली प्रवेशद्वारावर पर्यटकांचे स्वागत केले आणि त्यांना रवाना केले. जंगल सफारी करायला मिळणार यामुळे पर्यटकांमध्येही मोठा उत्साह दिसून आला. ताडोबा पर्यटकांसाठी खुला करण्यात आल्यामुळे आता याठिकाणी पर्यटकांची रेलचेल सुरू राहिल. त्यामुळे स्थानिक नागरिकांना देखील रोजगार मिळेल. ताडोबा जंगल सफारी सुरू झाल्यामुळे स्थानिक नागरिकांमध्ये देखील आनंदाचे वातावरण आहे.