Buldhana News : बुलढाण्याच्या रायपूरमध्ये एकाचा डेंग्यूमुळे मृत्यू; संतप्त झालेल्या नातेवाईकांनी मृतदेह आणला ग्रामपंचायत समोर

बुलढाणा : घाणीच्या साम्राज्याने साथरोगांचा फैलाव होत आहे. यात बुलढाणा तालुक्यातील रायपूर ग्रामपंचायतच्या गलथान कारभार आणि दुर्लक्षपणामुळे गावात घाणीचे साम्राज्य पसरले आहे. यामुळेच गावात साथरोग पसरले असून यात गावातील एका व्यक्तीचा डेंग्यूने मृत्यू झाला असून हा मृत्यू ग्रामपंचायतीच्या गलथान कारभाराने झाल्याचा आरोप करत नागरिकांनी मृतदेह थेट ग्रामपंचायतीच्या समोर आणून ठेवला आहे. 

बुलढाणा (Buldhana) तालुक्यातील रायपूर गावातील नाल्या तुडुंब भरलेले आहेत. ज्यामध्ये डासाची उत्पत्ती होऊन नागरिकांचे आरोग्य धोक्यात आले आहे. अशातच गावातील गजानन करडेल (वय ४८) या व्यक्तीला डेंग्यूचे (Dengue) निदान झाल्यानंतर प्रथम बुलढाणा व नंतर छत्रपती संभाजीनगर येथील घाटी रुग्णालयात त्यांना दाखल करण्यात आले. उपचार सुरू असताना त्यांचा मृत्यू झाला. त्यामुळे संतप्त झालेल्या नातेवाईकांनी ग्रामपंचायत प्रशासनाचा निषेध करत मृतदेह हा संभाजीनगर येथून सरळ ग्रामपंचायत समोर ठेवल्याने एकच खळबळ उडाली. 

यावेळी नातेवाईकांनी तात्काळ ग्रामपंचायतने (Grampanchayat) गावात स्वच्छता अभियान राबवून नागरिकांचे धोक्यात आलेले आरोग्य वाचवावे; अशी मागणी लावून धरली. नातेवाईकांचा हा आक्रमक पवित्रा पाहता ठाणेदार दुर्गेश राजपूत यांनी आपल्या पथकासह ग्रामपंचायत गाठून संतप्त झालेल्या नातेवाईकांची समजूत काढण्याचा प्रयत्न केला. त्यानंतर ग्रामपंचायत कडून आश्वासन मिळाल्यानंतर मृतदेहावर अंतिम संस्कार करण्यात आले.