Maharashtra Political News : विरोधी पक्षनेता ठरेल त्या दिवशी काँग्रेसमध्ये स्फोट होईल, प्रविण दरेकरांचा मोठा दावा

सचिन बनसोडे

Shirdi News : विधानसभेचा विरोधी पक्षनेता ठरेल त्या दिवशी काँग्रेसमध्ये स्फोट होईल, असा दावा भाजप नेते प्रविण दरेकर यांनी केला आहे. काँग्रेसचे अनेक आमदार भाजपच्या संपर्कात आहेत. 24 नाही तर 48 जागा आमची महायुती जिंकेल, असंही प्रविण दरेकर यांनी म्हटलं आहे.

जे स्वतःचा विरोधी पक्षनेता ठरवू शकत नाही ते 24 जागा कशा जिंकणार? त्यांच्या पक्षातच एकमत आणि समन्वय नाही. विरोधी पक्षनेता ठरवू शकत नाही ही त्यांची हतबलता आहे, अशी टीका प्रविण दरेकर यांनी काँग्रेसवर केली आहे. (Latest Marathi News)

ज्या दिवशी विरोधीपक्षनेता ठरेल त्या दिवशी काँग्रेसमध्ये स्फोट होईल. काँग्रेसचे अनेक आमदार भाजपच्या संपर्कात आहेत. आकडा आताच सांगू शकत नाही. सर्व पक्षातील चांगली लोकं राज्याच्या हितासाठी भाजपसोबत आली तर स्वागतच असेल, असंही दरेकर यांनी म्हटलं. (Political News)

उद्धव ठाकरेंच्या पोटात मळमळ

उद्धव ठाकरे  यांच्या भाषणावरुनही दरेकर यांनी त्यांच्यावर निशाणा साधला. ठाण्यातलं त्यांचं भाषण प्रभावहीन आणि भटकटलेलं होतं. ठाण्यात मराठी माणसांचा मेळावा घ्यायला हवा होता. मात्र मराठी माणसं जमतील की नाही याची भिती त्यांना होती.

मराठी माणसं शिंदे साहेबांसोबत आहेत. उत्तर भारतीयांनी आपण काय वागणूक दिली ते देशवासियांनी पाहिलं आहे, असंही दरेकर म्हणाले. आता मतांच्या लाचारीसाठी हे सगळं करत आहेत. सत्ता गेल्याने उद्धव ठाकरेंच्या पोटात मळमळ होत आहे, असंही दरेकर यांनी म्हटलं.