Ashish Deshmukh : आशिष देशमुख यांच्या सुरक्षेत वाढ; घराबाहेर Y दर्जाची सुरक्षा

पराग ढोबळे, नागपूर

भाजप नेते आशिष देशमुख यांच्या सुरक्षेत वाढ करण्यात आली आहे. त्यांच्यासोबत एक पोलीस उपनिरीक्षक आणि तीन पोलीस कर्मचारी अशी Y दर्जाची सुरक्षा व्यवस्था देण्यात आली आहे. तर घरीही सशस्त्र पोलीस कर्मचारी तैनात करण्यात आले आहेत.

आशिष देशमुख सावनेर मतदारसंघातून अनुजा सुनील केदार यांच्या विरोधात निवडणूक लढवण्याची दाट शक्यता आहे. त्या पार्श्वभूमीवर आशिष देशमुखांच्या सुरक्षेत वाढ करण्यात आल्याची माहिती मिळाली आहे.

2009 मध्ये आशिष देशमुख यांनी सावनेर विधानसभा मतदारसंघातून सुनील केदार यांच्या विरोधात निवडणूक लढवली होती. तेव्हा आशिष देशमुख यांचा 3000 मतांनी पराभव झाला होता.

सुनील केदार यांना न्यायालयाने दोषी ठरवलं पाच वर्षाची शिक्षा देखील देण्यात आली 22 वर्षानंतर 1444 कोटी रुपयांची वसुली हे त्यांच्याकडून होण्यासंदर्भात सहकार विभागाने आणि सहकारमंत्र्यांनी दिरंगाई केली, असा आरोपही आशिष देशमुख यांनी केला होता. तसेच या विरोधात १९ ऑक्टोबरला नागपूरच्या रामटेक तालुक्यात पीडित शेतकऱ्यांचा आणि खातेधारकांचा मोर्चा आयोजित करण्यात आला होता.

नागपूर जिल्हा मध्यवर्ती सहकारी बँकेच्या घोटाळ्यामध्ये सुनील केदार यांच्यावर आशिष देशमुखांकडून सातत्याने टिकास्त्र सोडलं जात आहे. काही दिवसांपूर्वी आशिष देशमुख यांनी या प्रकरणात वळसे पाटील वेळ काढत आहेत, असं म्हटलं होतं. सुनील केदार यांचे दिलीप वळसेंसोबत असलेले जुने संबंध आणि अनिल देशमुख यांचे धनंजय मुंडेंसोबत असलेले जुने संबंध यातून वेळ काढूपणा होत आहे. मात्र यामुळे विदर्भाच्या शेतकऱ्यांचं नुकसान होत आहे. शेतकरी अडचणीत असताना सुद्धा ते मंत्री कारवाई करण्यात टाळाटाळ करतात. दिलीप वळसे पाटील आणि धनंजय मुंडे यांनी आमची शेतकऱ्यांची हाक ऐकावी आणि त्यांना न्याय देण्यासाठी कार्यवाही करावी, अशी विनंती आशिष देशमुख यांनी केली होती.