भाजप आणि शिंदेंच्या शिवसेनेत तुफान हाणामारी; घटनेनंतर संपूर्ण नगरपरिषद सील

अक्षय गवळी, अकोला प्रतिनिधी

BJP and Shinde Sena clash at Hiwarkhed Municipal Council : अकोला जिल्ह्यातील हिवरखेड नगरपरिषदेत २७ नोव्हेंबर रोजी भाजप आणि शिंदेंच्या शिवसेनेत झालेल्या तुफान राड्यानंतर आता संपूर्ण नगरपरिषद सील करण्यात आली आहे. सर्वसाधारण सभेच्या कार्यक्रम पत्रिकेसोबत विषयांची सविस्तर टिपणी न दिल्याच्या कारणावरून भाजप आणि शिंदे गटाच्या नगरसेवकांमध्ये जोरदार हाणामारी झाली होती. हा राडा सभागृहाच्या आत आणि बाहेर अशा दोन्ही ठिकाणी घडला. या प्रकरणी दोन्ही गटांकडून परस्परविरोधी तक्रारी दाखल करण्यात आल्या असून पोलिसांनी गुन्हे नोंदवले आहेत.

हिवरखेड नगरपरिषदेच्या सर्वसाधारण सभेत कार्यक्रम पत्रिकेसोबत विषयांची सविस्तर माहिती देणारी टिपणी का देण्यात आली नाही, यावरून वादाची ठिणगी पडली. पाहता पाहता भाजप आणि शिंदे गटाच्या शिवसेनेचे नगरसेवक एकमेकांना भिडले आणि त्यांच्यात तुफान हाणामारी झाली. सभागृहाबाहेरही दोन्ही गट आमनेसामने आले होते.

या मारहाणीत शिवसेनेचे नगरसेवक तथा गटनेते रवी घुंगड आणि नगरसेवक ऋषी पंचबुद्धे यांना मारहाण झाल्याचा आरोप आहे. ही मारहाण नगराध्यक्षांच्या नातेवाईकांनी केल्याचा दावा केला जात आहे. मात्र, दोन्ही बाजूंनी परस्पर आरोप-प्रत्यारोप होत असल्याने CCTV फुटेज तपासल्यानंतरच नेमकी वस्तुस्थिती समोर येण्याची शक्यता आहे.

या राड्यानंतर दोन्ही गटांच्या नगरसेवकांनी व कार्यकर्त्यांनी एकमेकांविरोधात तक्रारी दिल्या असून पोलिसांनी परस्परविरोधी गुन्हे दाखल केले आहेत. गुन्हा दाखल झालेल्यांमध्ये भाजपच्या नगराध्यक्ष सुलभा दुतोंडे यांचे पती रमेश दुतोंडे व त्यांच्या दोन मुलांसह एकूण नऊ जणांचा समावेश आहे. दरम्यान, या घटनेतील सत्य समोर आणण्यासाठी नगरपरिषदेतील CCTV फुटेज हा अत्यंत महत्त्वाचा पुरावा मानला जात आहे. त्यामुळे पोलीस व नगरपरिषद प्रशासनाकडून CCTV फुटेज हस्तगत करेपर्यंत संपूर्ण हिवरखेड नगरपरिषद सील करण्यात आली आहे. तसेच सुरक्षेचा उपाय म्हणून नगरपरिषद परिसरात दोन पोलीस कर्मचारी तैनात करण्यात आले आहेत.