Traffic Jam Video : मुंबई- नाशिक महामार्गावर वाहतूक कोंडी; ५ ते ६ किलोमीटरपर्यंत वाहनांच्या रांगा

फय्याज शेख 
भिवंडी : भिवंडी शहरात सकाळपासून जोरदार पाऊस सुरु आहे. या पावसामुळे ठिकठिकाणी सखल भागात पाणी साचले असतानाच मुंबई- नाशिक महामार्गावरील भिवंडी- ठाणे बायपास मार्गावर वाहतूक विस्कळीत होऊन कोंडी झाली आहे. परिणामी या मार्गावर वाहनांच्या लांबच लांब रांगा लागल्या आहेत. 

राज्यातील अनेक भागात (Rain) पावसाने आज हजेरी लावली आहे. काही भागात मुसळधार पाऊस होत आहे. भिवंडी शहरात देखील सकाळपासून पाऊस सुरु असल्याने भिवंडी- ठाणे बायपास मार्गावर वाहतूकची समस्या निर्माण झाली आहे. भिवंडी- ठाणे बायपास महामार्गावर आठ पदरी मार्गाचे काम सुरु असून हे काम संथ गतीने सुरू असल्यामुळे ठीक ठिकाणी काम अर्धवट अवस्थेत आहे. त्यामुळे या महामार्गावर प्रचंड वाहतूक कोंडी झाली.  

वाहतूक सुरळीत होण्यास चार- पाच तासांचा कालावधी 

या मार्गावरून मुंबईच्या दिशेने जाणाऱ्या वाहनांच्या सुमारे पाच ते सहा किलोमीटरपर्यंत रांगा लागलेल्या आहेत. पावसामुळे झालेल्या वाहतूक कोंडीचा फटका या मार्गावरील माल वाहतूक करणारे व प्रवासी यांना बसत आहे. तर नाशिकच्या दिशेने देखील संथ गतीने वाहतूक सुरू आहे. ही वाहतूक सुरळीत होण्यासाठी सुमारे चार ते पाच तास लागू शकतात.