भिगवण तरुणी अपहरण प्रकरणात ट्विस्ट; मुलीने कोर्टात कुटुंबीयांना नेमकं काय सांगितलं? आईच्या पायाखालची जमीनच सरकली

पुणे जिल्ह्यातील इंदापूर तालुक्यातील भिगवण येथील अपहरण प्रकरणी पोलीस ठाण्यात गुन्हा दाखल करण्यात आला होता. अपहरण झालेली मुलगा आणि मुलगी गुरुवारी रात्री बारामती शहर पोलीस ठाण्यात हजर झाले. त्यामुळे या प्रकरणाला वेगळे वळण लागल्याचे पाहायला मिळालं.

पुण्याच्या भिगवण येथील 21 वर्षीय मुलीचे अपहरण झालं होतं, अशी तक्रार मुलीच्या आईने पोलीस ठाण्यात केली होती. तिच्या आणि मुलाच्या डोळ्यात चटणी टाकून अपहरण करण्यात आलं होतं, असा आरोप तक्रारीत केला होता. याबाबत इंदापूर तालुक्यातील भिगवण पोलीस ठाण्यामध्ये गुन्हा दाखल झाला होता. ही बातमी कळताच संतप्त नागरिकांनी पुणे सोलापूर राष्ट्रीय महामार्ग रोखला. आरोपींना तात्काळ अटक करण्याची मागणी केली होती. त्यानंतर बुधवारी भिगवण बंदची हाक देण्यात आली होती. या हाकेला भिगवणकरांनी शंभर टक्के प्रतिसाद दिला होता.

भाजपचे आमदार गोपीचंद पडळकर, आमदार संग्राम जगताप यांच्या नेतृत्वाखाली दुपारी हिंदू जन आक्रोश मोर्चा काढण्यात येणार होता. मात्र त्यापूर्वीच मुलीचा व्हिडिओ सोशल मीडियावर व्हायरल झाला होता. पण माझे अपहरण झाले नसून मी स्वतःच्या मर्जीने त्या युवकासोबत गेल्याचे मुलीने सांगितले. मुलीवर दबाव टाकून हा व्हिडिओ काढल्याचा आरोप आमदार गोपीचंद पडळकर यांनी केलाय.

अपहृत मुलगी आणि मुलगा हे गुरुवारी मध्यरात्री दोन वाजता बारामती पोलीस ठाण्यात हजर झाले. याच कालावधीत मुलीने प्रतिज्ञापत्र देखील सोशल मीडियावर व्हायरल केले. त्यामुळे या प्रकरणाला वेगळे वळण लागले. दुसरीकडे आमची मुलगी पळून गेलेली नसून तिला जबरदस्तीने उचलून नेण्याचा आरोप मुलीच्या आईने केला आहे.

तरुण-तरुणी दोघेही बारामती पोलीस ठाण्यात आले होते. त्यांचा जबाब नोंदवला आहे. मुलगी आणि आईच्या जबाबात तफावत आहे. पुढील तपास सुरू असल्याचे पोलीस अधीक्षकांनी सांगितले. मुलीला न्यायालयात हजर केले. त्यावेळी मुलीनं आईकडे जाण्यास नकार दिला. या प्रकरणी सखोल तपास सुरू असून त्यातून कोणती वेगळी माहिती पुढे येणार हे पाहणे महत्त्वाचे ठरणार आहे.