Bhandara Accident : कामावरून घरी परतताना दोघांना डंपरने उडविले; एकाचा मृत्यू, दुसरा गंभीर

शुभम देशमुख 
भंडारा : पेट्रोल पंपावर एकाच ठिकाणी काम करत असलेले दोघेजण ड्युटी आटोपल्याने घरी जाण्यासाठी निघाले. मात्र समोरून आलेल्या भरधाव डंपरने दुचाकीला जोरदार धडक दिल्याने भीषण अपघात झाला. या अपघातात एकाचा जागीच मृत्यू झाला. सोबतच सहकारी गंभीर जखमी झाला आहे. त्याला उपचारासाठी रुग्णालयात दाखल करण्यात आले आहे. 

हृदयद्रावक घटना भंडाऱ्याच्या बेला येथे घडली. या अपघातात नाशिक तिरपुडे (वय ५०, रा. फुलमोगरा) या इसमाचा मृत्यू झाला आहे. तर सहकारी कैलाश गजभिये (रा. अशोकनगर) हा गंभीर जखमी झाला आहे. दोघेही भंडाऱ्यातील गाढवे पेट्रोल पंपावर कामाला होते. दोघांची सोबत ड्युटी असल्याने येणे- जाणे सोबतच करत होते. त्यानुसार आज ड्युटी संपल्याने दोघे दुचाकीने घरी जाण्यासाठी सोबत निघाले होते. 

चाकाखाली आल्याने जागीच मृत्यू 

दरम्यान आज ड्युटी संपल्यानंतर दोघेही दुचाकीवरून घरी परत जात होते. त्याच वेळी रेतीने भरलेल्या भरधाव वेगाने आलेल्या डंपरने दुचाकीला समोरून जोरदार धडक दिली. डंपरची जोरदार धडक बसल्याने दोघे जण रस्त्यावर फेकले गेले. यामध्ये नाशिक तिरपुडे हे टिप्परच्या चाकाखाली आल्याने त्यांचा जागीच मृत्यू झाला. तर कैलाश गजभिये रस्त्याच्या दुसऱ्या बाजूला फेकले गेले असून ते गंभीर जखमी झाले आहेत.

अपघातानंतर आजूबाजूच्या परिसरातील नागरिकांनी धाव घेत अपघातात जखमीला लागलीच रुग्णालयात उपचारासाठी दाखल केले. तर घटनेची माहिती पोलिसांना देण्यात आली. यानंतर पोलिसांनी घटनास्थळी येत पंचनामा केला. तर अपघातामुळे महामार्गावर दोन्ही बाजूनी वाहतूक खोळंबली होती. तसेच घटनेची माहिती मिळाल्यानंतर मृताच्या कुटुंबीयांनी रुग्णालयात येत एकच आक्रोश केला.