Bear Attack : गुरे चारण्यासाठी गेलेल्या इसमावर अस्वलाचा हल्ला; गुराखी गंभीर जखमी

शुभम देशमुख 

भंडारा : जंगलात गुरांना चारण्यासाठी गेलेल्या इसमावर अस्वलाने अचानक हल्ला केला. या हल्ल्यात सदर गुराखी जखमी झाला आहे. अस्वलाच्या हल्ल्यात गुराखील गंभीर जखमा झाल्या असून त्याला उपचारासाठी सामान्य रुग्णालयात दाखल करण्यात आले आहे. 

भंडारा (Bhandara News) जिल्ह्यात दिवसेंदिवस जंगली प्राण्यांचा मनुष्यवरील हल्ल्यात वाढ होत आहे. जंगल परिसर असल्याने या भागात वन्य प्राण्यांचा अधिवास आहे. यामुळे या भागात कधी बिबट्याचे हल्ले तर कधी अस्वलाचे हल्ले झाल्याच्या घटना समोर येत आहेत. अशीच घटना भंडारा जिल्ह्यातील वाकल परिसरात घडली आहे. गुरांना जंगलात चराईकरीता नेले असताना जंगलात दबा धरून बसलेल्या (Bear) अस्वलाने गुरख्यावर हल्ला चढवून गंभीर जखमी केल्याची घटना अड्याळ वनपरिक्षेत्रा अंतर्गत येत असलेल्या वाकल येथे घडली आहे. 

सुरेश घनश्याम बोरकर (वय ३४) असे जखमीचे नाव आहे. अस्वलाने हल्ला केल्याने सुरेश हा जोरजोरात ओरडू लागला. यामुळे आवाज एकूण परिसरातील नागरिक धावत आले. अस्वलाच्या हल्ल्यात जखमी सुरेशला जिल्हा सामान्य रुग्णालयात उपचारासाठी दाखल करण्यात आले आहे. सद्या त्याची प्रकृती स्थिर असली तरी शरीरात गंभीर दुखापत झाली आहे.