Bhandara Crime : भंडारा दुहेरी हत्याकांडाने हादरले; सहा तासांत मारेकरी ताब्यात

शुभम देशमुख 
भंडारा : भररस्त्यावर गाठत हल्ला करत दोघांना खून करण्यात आल्याची घटना भंडारा शहरात घडली होती. या घटनेने शहरात खळबळ उडाली होती. भंडाऱ्यात घडलेल्या या दुहेरी हत्याकांडाचा पोलिसांनी कसून तपास करत अवघ्या सहा तासांत छडा लावला आहे. यानंतर पोलिसांनी चार हल्लेखोरांना ताब्यात घेतले आहे. घटनेचा पुढील तपास सुरु आहे. 

भंडारा शहरातील गजबजलेला परिसर असलेल्या मिस्कीन टैंक परिसरातील भर रस्त्यावर दोघांचा रॉड, चाकू आणि कुऱ्हाडी सारख्या शस्त्राचे घाव घालून खून केल्याची घटना शनिवारी रात्री घडली होती. या घटनेत टिंकू ऊर्फ वसीम फारूख खान (वय ३६, सौदागर मोहल्ला) आणि शशांक मनोहर गजभिये (वय २५, गणेशपूर, भंडारा) या दोघांचा मृत्यू झाला होता. भररस्त्यात घडलेल्या घटनेने शहरात खळबळ उडाली होती. 

सहा तासातच हल्लेखोर ताब्यात 

सदर घटनेनंतर अवघ्या सहा तासांत पोलिसांनी रात्र जागून नागपूर आणि भंडारा शहरात दडून बसलेल्या चारही हल्लेखोरांना पहाटे ताब्यात घेतले. पोलिसांनी अटक केलेल्यांमध्ये साहील साकीर शेख आणि फैजान साकीर शेख या दोघा भावंडांसह प्रीतम विलास मेश्राम (नांदोरा टोली, ता. भंडारा) आणि आयुष मुन्ना दहीवले (पेट्रोल पंप, ठाणा) यांचा समावेश आहे. या प्रकरणी अधिक चौकशी सुरु आहे. 

दरोड्यातील आरोपी ताब्यात

यवतमाळ शहरातील पांढरकवडा मार्गावर वाजता व्यावसायिकांच्या मालवाहू वाहनावर हल्ला करून त्याला लुटण्यात आले होते. या घटनेनंतर काही तासातच पोलिसांनी दोघांना अटक केली. मात्र इतर चार आरोपी पसार झाले होते, हे आरोपी सराईत गुन्हेगार असून त्यांच्यावर अनेक गुन्हे दाखल असल्याचे तपासात पुढे आले. आरोपीचा शोध घेत असताना एलसीबीच्या पुसद पथकाने सापळा रचून वडद (जि. परभणी) इथून दोघांना अटक केली. नामदेव चव्हाण आणि संतोष चव्हाण असे अटक करण्यात आलेल्या आरोपींची नावे आहे.