Bhandara Bandh : मोठी बातमी! आज 'भंडारा बंद'ची हाक; नेमकं कारण काय? पाहा काय उघडं अन् काय बंद राहणार

शुभम देशमुख, भंडारा प्रतिनिधी

Bhandara Bandh Latest Marathi News : भंडारा शहरात अवघ्या तीन वर्षांच्या चिमुकलीला सार्वजनिक शौचालयात नेऊन तिच्यावर अत्याचार करण्यात आल्याची भयंकर घटना घडली आहे. या घटनेचे तीव्र पडसाद संपूर्ण शहरात उमटले असून, संतप्त नागरिकांनी नराधम आरोपीला पकडून चांगलाच चोप दिला. या घटनेच्या निषेधार्थ आणि आरोपीवर कठोर कारवाईच्या मागणीसाठी आज 'भंडारा बंद'ची हाक देण्यात आली आहे. बाजारपेठा, दुकाने बंद राहणार आहे. अत्यावश्यक सेवा वगळता भंडारा बंद असेल अशी माहिती मिळत आहे.

मिळालेल्या माहितीनुसार, रोहित वासनिक (वय ३०) असे या गुन्हेगारी पार्श्वभूमी असलेल्या नराधम आरोपीचे नाव आहे. घटनेनंतर नागरिकांच्या मारहाणीत आणि स्वतःला जखमी करून घेतल्यानंतर आरोपीसह पीडित बालिकेला उपचारासाठी भंडारा मेडिकल कॉलेजमध्ये दाखल करण्यात आले. मात्र, "या नराधमावर येथे उपचार करू नका, त्याला आमच्या स्वाधीन करा," अशी आक्रमक भूमिका घेत संतप्त जमावाने मेडिकल कॉलेज परिसरात तब्बल ७ तास जोरदार राडा घातला.

परिस्थिती हाताबाहेर जात असल्याचे पाहून पोलीस मुख्यालयासह ६ राखीव पोलीस दल आणि जिल्ह्यातील सर्व पोलीस ठाण्यांची कुमक तातडीने मेडिकल कॉलेजमध्ये तैनात करण्यात आली होती. रात्री उशिरापर्यंत परिसरात प्रचंड तणावाचे वातावरण होते. अखेर प्रभारी जिल्हा पोलीस अधीक्षक, उपविभागीय अधिकारी आणि मेडिकल कॉलेजच्या अधिष्ठात्यांनी संतप्त नागरिकांशी चर्चा करून कडक कारवाईचे आश्वासन दिल्यानंतर रात्री ११ वाजेच्या सुमारास तणाव काहीसा निवळला.

या पाशवी कृत्यामुळे संपूर्ण भंडाऱ्यात संतापाची लाट पसरली असून, चिमुकलीला न्याय मिळवून देण्यासाठी आणि आरोपीला कठोर शिक्षा व्हावी या मागणीसाठी आज शहर कडकडीत बंद ठेवण्यात आले आहे. दुकाने, बाजारपेठा पूर्णपणे बंद ठेवण्यात येणार असल्याची माहिती समोर आली आहे. अत्यावश्यक सेवा वगळता भंडारा बंद असेल. रूग्णालय, शाळा सुरू राहतील, असे समजतेय.