Pankaja Munde : वैद्यनाथ बँकेवर पंकजा मुंडे यांचे वर्चस्व कायम, विरोधी उमेदवारांना डिपॉझिटही वाचवता आले नाही!

योगेश काशिद, साम टीव्ही, प्रतिनिधी

Beed : वैद्यनाथ अर्बन को-ऑपरेटिव्ह बँकेच्या १३ जागांसाठी मतदान झाले होते. एकूण १७ जागांपैकी ४ जागा यापूर्वीच बिनविरोध निवडून आल्या होत्या. उर्वरित १३ जागांसाठी मतदान करण्यात आले होते. यातील विरोधी उमेदवारांना डिपॉझिट वाचवण्याइतकेही मतदान मिळालेले नसल्याचे म्हटले जात आहे. वैद्यनाथ बँकेत पंकजा मुंडेंचा एकहाती विजय झाला आहे.

वैद्यनाथ बँकेच्या बीडसह राज्यभरात अनेक शाखा आहेत. या वैद्यनाथ बँकेच्या निवडणुकीची मतमोजणी आज (१२ ऑगस्ट) बीडच्या बाजार समितीत पार पडली. पंकजा मुंडे आणि धनंजय मुंडे या मुंडे बहीणभावाच्या नेतृत्त्वाखाली सर्व उमेदवार वैद्यनाथ अर्बन को-ऑपरेटिव्ह बँकेच्या निवडणुकीत विजयी झाल्याची माहिती समोर आली आहे.

विजयी कौल घेऊन नूतन वैद्यनाथ बँक संचालक मंडळ गोपीनाथ गडाकडे रवाना झाले आहे. गोपीनाथ गडावर लोकनेते स्वर्गीय गोपीनाथ मुंडे यांच्या समाधीस्थळी संचालक मंडळ नतमस्तक होणार आहे. वैद्यनाथ बँक निवडणुकीत मंत्री पंकजा मुंडे यांच्या पॅनलचे वर्चस्व पाहायला मिळत आहे. या निवडणुकीत पहिल्यांदाच मुंडे बहीण भाऊ एकत्र होते.

वैद्यनाथ बँकेच्या निवडणुकीमध्ये शरद पवारांच्या राष्ट्रवादी काँग्रेस गटाचे राजाभाऊ फड यांचा दारुण पराभव झाला. मुंडे यांचा उमेदवार असलेल्या रमेश कराड यांना १४३१६ मते मिळाली. तर शरद पवार गटाच्या राजाभाऊ फड यांना १४०७ मते मिळाली. या निवडणुकीच्या रिंगणात शरद पवार गटाचे तीन उमेदवार होते. पण पंकजा मुंडे यांनी आपले वर्चस्व कायम राखल्याचे दिसून आले.