Beed Vidhan Sabha : बीडमध्ये शिंदे गटातील अंतर्गत गटबाजी समोर; उमेदवारी कोणाला? पक्षप्रमुखासमोर असणार आव्हान

बीड : विधानसभा निवडणुकीचे बिगुल वाजले आहे. आता सर्वच पक्षाकडून जागा वाटप आणि उमेदवारी कोणाला? यासाठीची आखणी सुरु करण्यात आली आहे. दरम्यान बीड विधानसभा मतदारसंघात महायुतीच्या माध्यमातून शिंदे गटाने दावा केला आहे. मात्र उमेदवारी जाहीर होण्यापूर्वी अंतर्गत गटबाजी उफाळून येत असल्याने पक्ष प्रमुखांसमोर उमेदवारी देण्याचे आव्हान राहणार आहे. 

विधानसभा निवडणुकीसाठी राजकीय पक्षांची तयारी सुरु झाली आहे. प्रत्येक मतदार संघात चाचपणी करत पक्षांकडून दावा ठोकला जात आहे. दरम्यान बीड मतदारसंघात शिंदे गटाकडून जिल्हा प्रमुख अनिल जगताप यांचे नाव अग्रस्थानी असून मीच (Beed) बीड विधानसभेचा उमेदवार असेल, त्याची तयारी देखील सुरू आहे; असं अनिल जगताप यांनी म्हटले आहे. तर दुसरीकडे मात्र मुख्यमंत्री एकनाथ शिंदे यांच्या माध्यमातून आरोग्य दूत म्हणून काम पाहणारे बाजीराव चव्हाण देखील निवडणूक लढविण्यास इच्छुक असून त्यांनी पूर्वेश सरनाईक यांच्या उपस्थितीत शक्ती प्रदर्शन देखील केले आहे.

अजित पवार गटाकडूनही दावेदारी 
दरम्यान महायुतीकडून अजित पवार गट आणि शिंदे गट या दोघांकडूनही बीड विधानसभेवर दावा केला जातोय. मात्र महायुतीच्या चर्चेअंती बीडची जागा कोणाकडे जाते हे ठरेल. तसेच पक्षापुढे नेमकी उमेदवारी द्यायची कोणाला? याचे आव्हान असणार आहे.