बीडमधील धक्कादायक प्रकार! सीझरनंतर डॉक्टरांनी पोटातच सोडले हातमोजे अन् कागद; आईची मृत्यूशी झुंज सुरू

बीडच्या जिल्हा रुग्णालयातील डॉक्टरांच्या हलगर्जीपणांमुळे एका नवमातेची मृत्यूशी झुंज सुरूय. अवघ्या 19 वर्षांच्या संध्या सूरज गायकवाड या नवमातेच्या सीझर शस्त्रक्रियेदरम्यान डॉक्टरांनी निष्काळजीपणा केला. शस्त्रक्रियेदरम्यान डॉक्टरांनी मातेच्या पोटात हातमोजे (Surgical Gloves) आणि कागद तसाच सोडून दिला होता. या निष्काळजीपणामुळे ही महिला पुण्यातील ससून रुग्णालयात उपचार घेत आहे.

हाती आलेल्या माहितीनुसार, संध्या गायकवाड यांच्यावर 1 ऑगस्ट रोजी बीड जिल्हा रुग्णालयात सीझर शस्त्रक्रिया झाली होती. शस्त्रक्रियेनंतर ४ दिवसांनी त्यांना रुग्णालयातून डिस्चार्ज देण्यात आला. मात्र घरी आल्यावर संध्या यांच्या पोटात असह्य वेदना सुरू झाल्या, त्यानंतर संध्या यांची प्रकृती सातत्याने बिघडू लागली. कुटुंबीयांनी त्यांना एका खासगी रुग्णालयात नेऊन तपासणी केली. सोनोग्राफी आणि इतर वैद्यकीय चाचण्यांनंतर त्यांच्या पोटात काहीतरी वस्तू अडकल्याचे निष्पन्न झाले.

पुण्यातील ससूनमध्ये शस्त्रक्रिया

संध्या यांच्या पोटात काहीतरी वस्तू असल्याची बाब समोर आल्यानंतर कुटुंबीयांनी त्यांना पुण्याच्या ससून रुग्णालयात हलवण्यात आले. ससून रुग्णालयात पार पडलेल्या शस्त्रक्रियेदरम्यान डॉक्टरांनी संध्या यांच्या पोटातून सर्जिकल हातमोजे आणि कागद बाहेर काढल्याचा खळबळजनक दावा त्यांच्या कुटुंबीयांनी केलाय.

निष्काळजी डॉक्टरांवर कठोर कारवाईची मागणी

पीडित महिलेचे पती सूरज गायकवाड यांनी आरोप केला की, डॉक्टरांच्या हलगर्जीपणामुळेच त्यांच्या पत्नीची ही गंभीर अवस्था झालीय. "मुलीने बाळाला जन्म दिला, पण आज त्याला कुशीत घेण्याचीही तिच्यात ताकद उरलेली नाही. तिला त्रास होत असताना डॉक्टरांनी तिच्याकडे लक्ष दिलं नाही.