बीडमध्ये भयंकर घडलं; ग्रामपंचायत शिपायाला काळंनिळं होईपर्यंत मारलं, महिलेची छेड काढल्याचा आरोप

बीडमध्ये गुम्हेगारी घटनांमध्ये वाढ होत असताना आणखी एका एका घटनेमुळे खळबळ उडाली आहे. नांदगाव येथील ग्रामपंचायत शिपाईला बेदम मारहाण करण्यात आली आहे. मिळालेल्या माहितीनुसार, आठ ते दहा जणांनी मिळून त्यांच्यावर लाकडी दांडे आणि रॉडने हल्ला केला. त्यांची प्रकृती गंभीर असून, पोलीस आता आरोपींवर काय कारवाई करणार? हे पाहणं महत्त्वाचं ठरेल.

प्राथमिक माहितीनुसार, जालिंदर सुरवसे असे नांदलगाव येथील ग्रामपंचायतीत शिपाई म्हणून कार्यरत असणाऱ्या व्यक्तीचं नाव आहे. या मारहाणीत ते गंभीर जखमी झाले. महिलेची छेड काढल्याच्या आरोपावरून त्यांच्यावर अमानुष मारहाण झाली असल्याची माहिती समोर आली आहे. याची माहिती मिळताच आठ ते दहा जणांनी मिळून त्यांच्यावर हल्ला चढवला.

आरोपींनी सुरवसे यांच्यावर लाकडी दांडे आणि रॉडने वार केले. या हल्ल्यात सुरवसे गंभीर जखमी झाले. काळंनिळं होईपर्यंत त्यांना मारलं. हल्ल्यानंतर त्यांना तातडीने रूग्णालयात नेण्यात आले. सध्या त्यांच्यावर बीड येथील जिल्हा रुग्णालयात उपचार सुरू आहेत. त्यांचा एक पाय फ्रॅक्चर झाला असल्याची माहिती आहे. पोलिसांनी सुरवसे यांची तक्रार नोंदवून घेतली.

सुरवसे यांच्या तक्रारीवरून तलवाडा पोलीस ठाण्यात गुन्हा दाखल केला जाणार आहे. दरम्यान मारहाण करणाऱ्या व्यक्तींपासून आपल्याला धोका असल्याचे देखील सुरवसे आणि त्यांच्या नातेवाईकांनी म्हटलं आहे. या प्रकरणात आता पोलीस काय कारवाई करणार? याकडे सर्वांचेच लक्ष आहे. या घटनेनंतर परिसरात खळबळ उडाली आहे.