बीडमध्ये भरधाव ट्रॅक्टर आणि कारचा भीषण अपघात झालाय. या अपघातात आईसह मुलगा ठार झाला असून अन्य ३ जण गंभीर जखमी झाले आहेत. बीड परळी महामार्गावरील मैदा फाट्याजवळ हा भीषण अपघात झालाय. घटनेची माहिती मिळताच पोलीस घटनास्थळी दाखल झालेत. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)
मिळालेल्या अधिक माहितीनुसार, रत्नमाला केशव पवार (वय ४१) प्रदीप केशव पवार (वय २४) अशी मृत मायलेकांची नावं आहेत. हे दोघेही उपळी ता.वडवणी येथील रहिवासी होते. कारने जात असताना मैदा फाट्याजवळ पोहचताच त्यांच्या कारची आणि ट्रॅक्टरची जोरदार धडक झाली. अपघातात कारने प्रवास करणाऱ्या अन्य तीन व्यक्ती गंभीर जखमी आहेत.
अपघातात जखमी व्यक्तीपैकी एकाने विषारी औषध घेतलं होतं. त्या व्यक्तीला तातडीने रुग्णालयात दाखल करण्यासाठी हे सर्वजण कारने बीड जिल्हा रुग्णालयाकडे निघाले होते. मात्र वाटेतच मोठा अनर्थ झाला. कारचा अपघात झाल्याने माय लेकाचा मृत्यू झाला. मात्र ज्याने औषध प्राशन केलं त्याच्यासह अन्य दोघे जखमी आहेत.
नितीन सुभाष वेताळ, अनुसया सुभाष वेताळ, प्रमोद देविदास चव्हाण अशी जखमी व्यक्तींची नावे आहेत. हा अपघात इतका भीषण आहे की, ट्रॅक्टरचे हेड तुटून दोन तुकडे झालेत. तर कारचा देखील चक्काचूर होऊन कार रस्त्याच्या खाली खड्ड्यात जाऊन पडली. जखमींवर बीड येथे दवाखान्यात उपचार सुरू असून या घटनेने उपळी गावावर शोककळा पसरली आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.