Beed Accident: मद्यधुंद कार चालकानं दोघांना उडवलं; 2 दुचाकींना धडक देत दुकानात घुसली कार

योगेश काशिद, साम प्रतिनिधी

बीडमधील केज शहरातील वदर्ळीच्या कानडी माळी चौकात एका मद्यधुंद कार चालकानं दोन जणांना उडवल्याची घटना घडली. दोन दुचाकींना धडक देत कार थेट दुकानात घुसल्याने दुकानांचे मोठे नुकसान झाले आहे. राम लक्ष्मण धर्मा (रा. मेंढक तेलंगणा ) असे कार चालकाचे नाव आहे. कार चालकासोबत अजून एक व्यक्ती कारमध्ये होता. धनराज बन्सी चाळक ( रा. लव्हूरी ता. केज) असे त्याचे नाव आहे. हे दोघेही मद्यधुंद अवस्थेत होते.

हाती आलेल्या माहितीनुसार, दिनांक ९ जानेवारी रोजी दुपारी १:०० वाजण्याच्या सुमारास केज येथील कानडी माळी चौकात हा अपघात झाला. येथे एका स्विफ्ट डिझायर कार चालकाने कानडी माळी चौकातील भगवान बाबा चबुतऱ्याजवळ कानडी माळीकडे वळत असताना एका मोटार सायकलीला मागून धडक दिली. त्या दुचाकीवर बसलेली महिला जखमी झाली. आशाबाई धोंडीबा राऊत ( रा. समर्थनगर केज) असं जखमी झाल्या महिलेचं नाव आहे.

दुचाकीला धडक झाल्यानंतर कार चालक भरधाव वेगात कार पळवून नेण्याचा प्रयत्न करू लागला. त्यावेळी उजव्या बाजूला असलेल्या दोन दुकानांना धडक दिली. या अपघातात दुकाना समोर उभ्या असलेल्या दोन दुचाकीचं नुकसान झालं. यात एक स्कुटी क्र. (एम एच-४४/ए डी-९४८०) आणि मोटार सायकल क्र (एम एच-२५/एस-१७२३) यांचे नुकसान झाले. या अपघातात विद्यार्थ्याच्या सायकलची नुकसान झाले. तर अपघात काही नागरिक देखील व विद्यार्थी देखील किरकोळ जखमी झाले आहेत.

या अपघात दुचाकीवर मागे बसलेल्या आशाबाई धोंडीबा राऊत ( रा. समर्थनगर केज) आणि कारचालक राम लक्ष्मण धर्मा (रा. मेंढक तेलंगणा ) आणि त्यांच्यासोबत असलेला धनराज बन्सी चाळक ( रा. लव्हूरी ता. केज) हे तिघे जखमी झालेत. अपघात झाल्याची माहिती मिळताच पोलीस कर्मचारी घट्नास्थळी झाले. निरीक्षक स्वप्नील उनवणे यांच्या आदेशाने सहाय्यक पोलिस निरीक्षक संदीप मांजरमे, दत्तात्रय बिक्कड, राजू वाघमारे, बाळासाहेब अहंकारे, शिवाजी कागदे, त्रिंबक सोपने, संतोष गित्ते, गोरख फड, तांबारे यांनी अपघातस्थळी जाऊन जखमींना उपचारासाठी उपजिल्हा रुग्णालयात हलवून वाहतूक सुरळीत केली.