Shocking News : धक्कादायक! रिक्षाचालकाचं भयंकर कृत्य, नववीतील विद्यार्थ्यावर नेलकटरनं हल्ला

अक्षय गवळी, अकोला, साम टीव्ही

Akola auto driver attack student : अकोल्यात एक धक्कादायक आणि तितकीच चीड आणणारी घटना घडली आहे. नववी इयत्तेत शिकणाऱ्या एका विद्यार्थ्यावर रिक्षाचालकानं नेलकटरनं हल्ला केला. नेलकटरमध्ये असलेल्या लहान चाकूनं विद्यार्थ्याच्या हातावर वार केले. यात संबंधित विद्यार्थी जखमी झाला आहे. या प्रकरणी पोलीस ठाण्यात हल्लेखोर रिक्षाचालकाविरोधात तक्रार दाखल करण्यात आली आहे.

अकोला शहरातील मिराज टॉकीजसमोर ही संतापजनक घटना घडली. नववीत शिक्षण घेत असलेल्या शाळकरी विद्यार्थ्यावर रिक्षाचालकानं नेलकटरमधील चाकूने हल्ला केला. हा मुलगा शाळेतून घरी जात होता. त्यानं रिक्षा पकडली. त्यानं रिक्षाचं भाडं चालकाला दिलं. त्यानंतर उर्वरित सुटे पैसे परत मागितले. त्यावर रिक्षाचालकानं हुज्जत घातली. धक्कादायक म्हणजे रागाच्या भरात चालकानं विद्यार्थ्यावर नेलकटरने हल्ला केला. त्यातील चाकू काढून त्याच्या हातावर वार केले.

या हल्ल्यात विद्यार्थ्याच्या हाताला किरकोळ दुखापत झाली आहे. सोहम असं या विद्यार्थ्याचं नाव आहे. या घटनेनंतर सिव्हिल लाईन पोलीस ठाण्यात संबंधित रिक्षाचालकाविरोधात तक्रार दाखल करण्यात आली आहे. हल्ला करणाऱ्या रिक्षाचालकाचं नाव अद्याप कळू शकलेलं नाही. पोलीस त्याचा शोध घेत आहेत.

दरम्यान, रिक्षाचालकासोबत नेमकं काय घडलं याची माहिती विद्यार्थ्यानं दिली. शाळेतून घरी जाण्यासाठी मी रिक्षा पकडली. कारण माझा रोजचा रिक्षाचालक असतो तो आला नव्हता. मला त्या रिक्षाचालकानं टॉकीजसमोर सोडलं. मी त्याला ५० रुपये दिले. त्याच्याकडून ३० रुपये परत मागितले. कुठले तीस रुपये असं तो रिक्षाचालक म्हणाला. मी माझ्या घरी फोन लावतो, तू त्यांच्यासोबत बोल असं मी चालकाला सांगितलं. त्याने वाद घातला. त्यावर त्यानं माझ्यावर हल्ला केला आणि पळून गेला, असं विद्यार्थ्यानं सांगितलं.