Alibag; छोट्या व्यवसायिकांना बनावट नोटा देऊन फसविणारे त्रिकुट अटक

राजेश भोस्तेकर

रायगड : अलिबागमध्ये बनावट नोटा छापून छोटे व्यवसायिकांना वटविण्याचा गोरख धंदा हा सुरू होता. बनावट नोटा छापून त्या वटविणाऱ्या तिघांच्या मुसक्या स्थानिक गुन्हे पथकाने आवळल्या आहेत. त्याच्याकडून ५००, २०० आणि १०० रुपयांच्या नोटा जप्त करण्यात आले आहेत. जयदीप अजित घासे (वय- 26), सुमित सुनील बागकर (वय- 26), कौस्तुभ चंद्रकात गीजम (वय- 24) असे पकडणाऱ्या त्रिकुटाची नावे आहेत.

हे देखील पहा-

यामध्ये एकाचा शोध स्थानिक गुन्हे विभागाकडून सुरू आहे. या भामट्यांनी भाजी, कांदा, बटाटा, मासळी तसेच अन्य छोट्या व्यावसायिकांना बनावट नोटा देऊन फसविल्याची शक्यता आहे. २९ सप्टेंबर या दिवशी अलिबाग बायपास या ठिकाणी कांदा बटाटा व्यवसाय करणाऱ्या अशोक पोकळे यांच्याकडून जयदीप आणि सुमित याने कांद्याच्या २ गोणी खरेदी केले होते. त्यानंतर १०० रुपयांच्या २२ नोटा असे २ हजार २०० रुपये दिले होते.

मात्र, दिलेल्या नोटा या खोट्या असल्याचे समजल्यावर अलिबाग पोलिसात तक्रार देण्यात आली आहे. यानुसार स्थानिक गुन्हे विभागाचे पोलीस निरीक्षक दयानंद गावडे यांनी पथक तयार करून, या भामट्या त्रिकूटाना अटक करण्यात आली आहे. त्याच्याकडून लॅपटॉप, शाई, प्रिंटर, कोरे कागद ५०० रुपयांच्या ६३ नोटा, २०० रुपयांच्या ८२ तर १०० रुपयांच्या २२ नोटा असा मुद्देमाल जप्त केला आहे. बाजारात या चलनाची किंमत ४९ हजार ९०० रुपये आहे. या भामट्यांना न्यायालयात हजर केले असता मंगळवारपर्यत पोलीस कोठडी सुनावली असल्याचे पोलीस निरीक्षक दयानंद गावडे यांनी सांगितले आहे.

Edited By- Digambar Jadhav