Ahmednagar Crime News : अहमदनगरमध्ये दरोडेखोरांच्या मारहाणीत दोघांचा मृत्यू, एक गंभीर जखमी; परिसरात भीतीचं वातावरण

सुशील थोरात

Ahmednagar News : अहमदनगरमधून एक धक्कादायक घटना समोर आली आहे. दरोडेखोरांनी केलेल्या हल्ल्यात दोघांचा मृत्यू झालाय, तर एक जण गंभीर जखमी आहे. गेल्या काही दिवसांपासून शेवगावमध्ये दरोडेखोरांनी अक्षरश: धुमाकूळ घातला आहे.

गोपीकिशन बलदवा, पुष्पा बलदवा अशी मृतांची नावं. तर सुनीता बलदवा या गंभीर जखमी आहेत. मिळालेल्या माहितीनुसार, शेवगाव शहरातील भुसार मालाचे व्यापारी गोपीकिश बलदवा यांच्या शेवगाव शहरातील बाजारपेठेमधील राहत्या घरावर रात्री 3 ते 4च्या दरम्यान चोरट्यांनी दरोडा टाकला.

त्यामध्ये गोपीकिशन बलदवा व त्यांच्या मोठ्या भावजय पुष्पा हरिकिशन बलदवा या दोघांचा दरोडेखोरांच्या मारहाणीत मृत्यू झाला. त्याचबरोबर सुनिता गोपीकिशन बलदवा या घटनेमध्ये जखमी झाल्या आहेत. (Crime News)

दरोडेखोरांच्या हल्ल्यात दोन जणांचा जागीच मृत्यू झाल्याने एकच खळबळ उडाली आहे. बलदावा कुटुंबियांना लोखंडी सळई साहाय्याने मारहाण केल्याचं इतर जखमी सदस्यांनी सांगितलं.

घटनेची माहिती मिळताच पोलीस अधीक्षक राकेश ओला पथकासह घटनास्थळी दाखल झाले आणि घटनास्थळाची पाहणी केली. या घटनेमुळे शेवगाव तालुक्यात घबराट पसरली आहे.  (Latest Marathi News)

घटनास्थळावर व्यापाऱ्यांनी मोठी गर्दी केली होती. व्यापाऱ्यांच्या भावना अतिशय तीव्र होत्या. शेवगावमध्ये झालेल्या दरोड्याच्या निषेधार्थ शेवगाव शहरातील सर्व व्यापारी आणि नागरिकांच्या वतीने शेवगाव बंदची हाक देण्यात आली आहे, अशी माहिती भाजपचे जिल्हाध्यक्ष अरुण मुंडे यांनी दिली आहे.