Akola News: अकोल्यात सफरचंद शेतीला फटका! वाऱ्यामुळे सफरचंद गळून पडले; तर गहू, मकासोबत इतर पिकांनाही मोठा फटका

अक्षय गवळी/साम टीव्ही न्यूज

अकोल्यातल्या तेल्हारा आणि अकोट तालुक्यातल्या अवकाळी पावसाचा तडाखा बसला आहे. अकोट तालुक्यातल्या ऐदलापूर शेत शिवारात सफरचंद शेतीला मोठा फटका बसला आहे. नवनीत चांडक यांच्या सफरचंद शेतीला अवकाळी पावसाचा तडाखा बसला आहे. अक्षरशः झाडाला लागलेले सफरचंद वाऱ्यामुळे गळून पडले. दरम्यान तेल्हारा तालुक्यातल्या हिंगणी, दानापूर, तळेगाव बाजारसह आदी गावांना देखील अवकाळी पावसाचा फटका बसला आहे.

पपई, आंबा, गहू, ज्वारी, मका, कांदा आणि केळी बागा देखील वाऱ्यामुळे उध्वस्त झाले. रात्री उशिरा तेल्हारा आणि अकोट तालुक्यात अवकाळी पावसासह जोराचा वारा झाला होता. याच वाऱ्यामुळे अक्षरशः मका आणि केळी बागासह पपई बाग उध्वस्त झाल्या. शेतात तोडणी करून कापणीसाठी ठेवलेल्या मका पिकाला अवकाळी पावसाचा तडाखा बसला आहे. त्यामुळे शेतकऱ्यांचं अतोनात नुकसान झाले आहे.

दरम्यान सलग तिसऱ्या दिवशी अकोल्यात पावसाचा तडाका पाहायला मिळाला आहे. या आधीही अकोल्यातल्या मुर्तीजापुर बार्शीटाकळी आणि बाळापूर तालुक्याला अवकाळी पावसाचा फटका बसला होता. त्या पाठोपाठ आता तेल्हार्याला आणि अकोट तालुक्याला अवकाळी पावसाने झोडपून काढले आहे. त्यामुळे पुन्हा बळीराजा पुन्हा संकटात सापडला आहे.

कालचं बाळापुर तालुक्यात शेतकऱ्यांचं होतं नुकसान

बाळापुर तालुक्यात अवकाळी पावसाचा कहर होता. याशिवाय सोबत वारा देखील वाहत होता. या वाऱ्यामुळे अनेक केळी उत्पादक शेतकऱ्यांचे नुकसान झाले होते. दरम्यान, वाऱ्यामुळं केळी बागा पडल्या होते. अनेक केळीचे घड अक्षरश: मातीत भिजल्या गेल्याने पूर्णतः नुकसान झालं आहे. जवळपास एकरी ३५ ते ४० टक्के शेतकऱ्यांच नुकसान झालं.

अवघ्या दोन दिवसांवर केळी कापण्यावर आली होती, मात्र अवकाळी पावसाचा फटका बसल्याने शेतकऱ्यांकडं ऐनवेळी व्यापाऱ्यांनी पाठ फिरवली होती. तर काढणी करून कापण्यासाठी ठेवण्यात आलेला कांदा पिकाचे देखील शेतातलं मोठं नुकसान झालं होतं. तामशी गावातच शेतकऱ्यांचा अतोनात नुकसान पाहायला मिळालं होतं. मिथुन काळे या शेतकऱ्याचा जवळपास ४०० क्विंटल कांदा पूर्णतः पाण्यात भिजला गेला होता.