Ravi Rana News : आमदार रवी राणांची मंत्रिपदासाठी लॉबिंग; मंत्रिमंडळात स्थान मिळण्याची शक्यता, राणा समर्थकांची अमरावती बॅनरबाजी

अमर घटारे 
अमरावती : विधानसभा निवडणुकीनंतर महायुतीने सरकार स्थापन केले आहे. आता मंत्री मंडळ विस्ताराची प्रतीक्षा असून कोणाला मंत्री पद मिळणार याची उत्कंठा कार्यकर्त्यांमध्ये आहे. यात अमरावती जिल्ह्यात आमदार रवी राणा याना मुख्यमंत्री देवेंद्र फडणवीस हे मंत्रिमंडळात स्थान देणार असल्याचे बोलले जात आहे. त्या अनुषंगाने राणा यांच्या समर्थकांकडून शहरात बॅनर लावण्यात आले आहे. 

विधानसभा निवडणुकीत अमरावती जिल्ह्यात महायुतीला पहिल्यांदाच मोठे यश मिळाले आहे. याठिकाणी ८ पैकी ७ जागांवर महायुतीचे आमदार निवडून आले आहेत. हा विजय खेचून आणण्याचा मोठा हात असून राणा दाम्पत्याला सत्ता स्थापनेत मोठं गिफ्ट मिळण्याची शक्यता वर्तविली जात आहे. त्यामुळे राणा दांपत्य हे मुंबई आणि दिल्लीत तळ ठोकून असल्याचे पाहायला मिळत आहे. 

अमरावती जिल्ह्यात महायुतीचे सात आमदार निवडून आले आहे. यामध्ये रवी राणा यांना कॅबिनेट मंत्रीपद हे निश्चित असल्याचे बोलले जात आहे. दरम्यान लोकसभा निवडणुकीत नवनीत राणा यांचा पराभव होऊन सुद्धा राणा दाम्पत्याने जिल्हा पिंजून काढत जिल्ह्यात महायुतीचे ७ आमदार विजयी केले. यात भारतीय जनता पक्षाचे पाच, युवा स्वाभिमानचे रवी राणा, तर अजित पवारांच्या राष्ट्रवादीच्या सुलभा खोडके यांचा समावेश आहे. त्यामुळे राज्य मंत्रीमंडळात रवी राणा यांची वर्णी लागण्याची दाट शक्यता आहे. 

कार्यकर्त्यांकडून बॅनरबाजी 

मंत्रिमंडळ विस्तार आगामी काही दिवसात असल्याने आमदार रवी राणा हे मुंबई व दिल्लीत तळ ठोकून आहे. अमरावतीचे पालकमंत्री व कॅबिनेट मंत्री पद रवी राणा यांना मिळणार असल्याची माहिती आहे. यामुळे जिल्ह्यात युवा स्वाभिमान व भाजप कार्यकर्त्यांमध्ये उत्साह संचारला आहे. रवी राणा हे भावी कॅबिनेट मंत्री अश्या आशयाचे कार्यकर्त्यांनी जिल्ह्यात बॅनर सुद्धा लावलेले आहे.