Amravati : धक्कादायक! सीनिअरचा त्रास असह्य झाला, फायर ब्रिगेड कर्मचाऱ्याची आत्महत्या

अमर घटारे, साम टीव्ही

Amravati Latest Marathi News : वरिष्ठांच्या त्रासाला कंटाळून अमरावती महानगरपालिकेच्या फायर ब्रिगेड कर्मचार्‍याने आयुष्याचा दोर कापला आहे. बडनेरा झोन मध्ये कार्यरत असलेले राजेश मोहन असे विष प्राशन करून आत्महत्या करणाऱ्या कर्मचाऱ्याचे नाव आहे. राजेश मोहन यांना आत्महत्येस प्रवृत्त करणारे मनपा कर्मचारी संतोष केंद्रे व लक्ष्मण पावडे या दोन कर्मचार्‍यांवर गुन्हे दाखल करून अटकेची मागणी करण्यात आली आहे.

अग्निशामक दलाचे लक्ष्मण पावडे आणि संतोष केंद्रे हे दोन अधिकारी वारंवार मानसिक त्रास देत होते त्यामुळे आत्महत्या करत असल्याचा मृत्यूपूर्व कर्मचाऱ्यांचा संभाषणाचा व्हिडिओ व्हायरल झाला आहे. काल रात्रीपासून अमरावतीच्या पोस्ट मार्टम ऑफिसबाहेर सरन्यायाधीश भूषण गवई यांच्या मातोश्री कमलताई गवई यांच्यासह नातेवाईक आणि आझाद समाज पार्टीच ठिय्या आंदोलन सुरू आहे.

रात्री उशिरा दोषी अग्निशामक दलाचे लक्ष्मण पावडे आणि संतोष केंद्रे यांच्या निलंबनाचे आदेश अमरावती महानगरपालिका आयुक्त यांनी काढले. तीन दिवसांपासून मृतक अग्निशामक दलाच्या कर्मचाऱ्यांचे शवविच्छेदन नाही. काँग्रेसच्या माजी मंत्री यशोमती ठाकूर यांनी यावेळी कुटुंबीयांची भेट घेऊन सांत्वन केले. वरिष्ठ अधिकाऱ्यांशी फोनवरून संवाद साधून तात्काळ कारवाई करण्याची विनंती केली. दोषी अधिकाऱ्यांवर गुन्हे दाखल करून अटक होईपर्यंत शवविच्छेदन करू देणार नाही, न्याय जर मिळाला नाही तर मी इथेच माझ्या नवर्‍या प्रमाणे विष घेऊन आत्महत्या करेल, असा इशारा पत्नीने दिला आहे.