Amravati Crime : दारू पिण्यासाठी पैसे मागत त्रास दिल्याने राग अनावर; तरुणाची दगडाने ठेचून हत्या

अमर घटारे 

अमरावती : दारू पिण्याचे व्यसन असल्याने सातत्याने दारू पिण्यासाठी पैसे मागत त्रास द्यायचा. वारंवार होत असलेल्या पैशांची मागणी होत असल्याने राग अनावर झाला. यातून एका युवकाची दगडाने ठेचून हत्या करण्यात आल्याची घटना अमरावती शहरात रात्रीच्या सुमारास घडली आहे. सदर घटनेमुळे परिसरात खळबळ उडाली असून पोलिसांकडून या प्रकरणी तपास सुरु आहे. 

अमरावती शहरातील खोलापूर पोलीस स्टेशन हद्दीतील राऊत वाडी परिसरात सोमवारी रात्रीच्या सुमारास ही घटना उघडकीस आली आहे. घटनेतील मृतकाचे ओळख पटलेली नाही. दरम्यान घटनेत मृत तरुण आणि मारेकरी हे एकमेकांना ओळखत नव्हते. मात्र परिसरात मृत तरुण हा दारू पिण्यासाठी वारंवार पैशांची मागणी करत होता. बऱ्याचदा यातून वाद देखील झाले होते. त्यानुसार रात्री मृत संबंधितांकडे पैशांची मागणी करू लागला होता. 

राग अनावर होऊन डोक्यात घातला दगड 
रात्री राऊत वाडी परिसरात मृत तरुण दारू पिण्यासाठी पैशांची मागणी करू लागला. वारंवार होत असलेल्या त्रासाला कंटाळून राग अनावर झाल्याने तिघांनी मिळून तरुणाला मारहाण केली. यानंतर त्याच्या डोक्यात दगडाने वार करत हत्या केली. दरम्यान या नंतर तिघा संशयित आरोपींनी पोलीस स्टेशनला जाऊन आत्मसर्पण केलं आहे. आरोपी देखील मृतकला नावाने ओळखत नाहीत. त्यामुळे मृतक कोण हा प्रश्न उपस्थित होत आहे. 

पोलिसांकडून तपास सुरु 
दरम्यान घटनेची माहिती पोलिसांना मिळताच पोलिसांचे पथक घटनास्थळी दाखल झाले. घटनेचा पंचनामा करत तपासाला सुरवात केली आहे. तर अद्याप पर्यंत मृतकाची ओळख पटली नाही. पोलिसांकडून या प्रकरणाची आता सखोल चौकशी सुरू झाली आहे. मात्र रात्री घडलेल्या या घटनेमुळे परिसरात खळबळ उडाली आहे.