Maharashtra Politics : महायुतीत ठिणगी? अजित पवारांनी बाहेर पडावं, NCP नेत्याचं खळबळजनक विधान, VIDEO

अक्षय गवळी, साम टीव्ही प्रतिनिधी

अकोला : आगामी विधानसभा निवडणुकीमुळे सर्व राजकीय पक्षांना वेध लागले आहेत. यावर्षी झालेल्या लोकसभा निवडणुकीत महायुतीला मोठा फटका बसला. त्यानंतर राष्ट्रीय स्वयंसेवक संघाकडून अजित पवार गटावर टीका झाली. त्यामुळे महायुतीत अजित पवार गटाला एकटं पाडलं जात आहे, असा आरोप काही नेत्यांकडून केला जात आहे. त्यानंतर आमदार अमोल मिटकरी यांनी स्वत:च्या पक्षाकडे मोठी मागणी केली. विधानसभेसाठी अजित पवार आणि प्रकाश आंबेडकरांनी एकत्र यावं, अशी मागणी अमोल मिटकरी यांनी स्वत:च्या पक्षाकडे केली आहे.

अमोल मिटकरी यांनी अकोल्यात माध्यमांशी संवाद साधला. यावेळी अमोल मिटकरी यांनी स्वत:च्या पक्षाकडे मोठी मागणी केली. 'अजित पवार यांनी वंचित बहुजन आघाडीचे अध्यक्ष प्रकाश आंबेडकर यांनी एकत्र यावं, असं वक्तव्य अमोल मिटकरी यांनी केलं आहे.

अमोल मिटकरी पुढे म्हणाले, 'नव्या युतीबाबत आपलं वैयक्तिक मत आहे. तरी पक्षाने यावर विचार करण्याची मागणी त्यांनी केली आहे. महायुतीत अजित पवारांना एकटं पाडण्याचा प्रयत्न होत आहे. त्यांनी काहीही करून महायुती सोडावी, यासाठी दोन्ही मित्र पक्षातील काही नेते प्रयत्न करत आहेत, असा आरोप मिटकरी यांनी केला आहे.

'काही लोक मानसिक खच्चीकरण करण्याचा प्रयत्न करत आहे, असा गंभीर आरोप मिटकरींनी व्यक्त केला. अजित पवार आणि प्रकाश आंबेडकर एकत्र आले तर विधानसभा निवडणुकीत दोन्ही नेते महाराष्ट्राचं राजकारण बदलवून शकतील, असा आशावादही मिटकरी यांनी व्यक्त केला आहे.

दरम्यान, लोकसभा निवडणुकीत अजित पवार गटाला चारपैकी फक्त एकच जागा जिंकता आली. तर वंचित बहुजन आघाडीचा एकही उमेदवार निवडणुकीत जिंकू शकला नाही. वंचित बहुजन आघाडीचे अध्यक्ष प्रकाश आंबेडकर यांनाही अकोला लोकसभा मतदारसंघात पराभवाला सामोरे जावं लागलं. आगामी विधानसभा निवडणूक ही ऑक्टोबर महिन्यात होण्याची शक्यता वर्तवण्यात येत आहे. यादरम्यान, अमोल मिटकरी यांनी केलेल्या वक्तव्यामुळे राजकीय वर्तुळात चर्चांना उधाण आलं आहे.