Ambarnath : बाप्पा समोरील मोदकाची तब्बल १ लाख ८५ हजारांची बोली; अंबरनाथमध्ये मोदकांचा लिलाव

अंबरनाथ : दहा दिवस गणेशोत्सव साजरा झाल्यानंतर काल लाडक्या गणरायाला निरोप देण्यात आला. या दरम्यान अंबरनाथमध्ये गणपती बाप्पासमोर ठेवलेल्या मोदकाची लिलाव प्रक्रिया पार पाडण्यात आली. या मोदकांचा तब्बल १ लाख ८५ हजार रुपयांना लिलाव करण्यात आला. अंबरनाथ पश्चिमेच्या खाटूश्याम मित्र मंडळाने आपली अनेक वर्षांची परंपरा कायम ठेवत हा लिलाव केला.

दहा दिवस चाललेल्या गणेशोत्सवाची काल म्हणजे अनंत चतुर्दशीला सांगता झाली. लाडक्या गणरायाची मनोभावे पूजा केल्यानंतर विसर्जन करण्यात आले. सार्वजनिक गणेश मंडळांकडून काही परंपरा जपल्या आहेत. यात अंबरनाथमधील खाटूश्याम मित्र मंडळाकडून बुवापाडा परिसरात सार्वजनिक गणेशोत्सव साजरा केला जात असून यंदा मंडळाचे ३३ वे वर्ष आहे. मंडळाकडून वेगवेगळे उपक्रम राबविण्यासोबत मोदकांचा लिलाव करण्याची परंपरा सुरु केली आहे. 

बाप्पाजवळ दोन दिवस ठेवला जातो मोदक  

या मंडळाकडून दरवर्षी अनंत चतुर्दशीच्या दोन दिवस आधी एक मोठा मोदक गणपती बाप्पा जवळ ठेवला जातो. या मोदकाचा अनंत चतुर्दशीला लिलाव केला जातो. हा मोदक जो भाविक विकत घेतो, त्याची भरभराट होते, अशी इथल्या स्थानिकांची श्रद्धा आहे. यातून भाविक मोठ्या संख्येने मोदक खरेदीसाठी गर्दी करत असतात. त्यामुळेच अगदी पैसे नसले, तरी लोक जुळवाजुळव करून या मोदकासाठी बोली लावतात. 

पावणे दोन लाखांची लावली बोली 

यावर्षी अनामिका त्रिपाठी यांनी हा मोदक लिलावात विकत घेतला. तब्बल १ लाख ८५ हजार रुपयांची सर्वोच्च बोली लावत विकत घेतलेला हा मोदक त्यांनी त्यांचे वडील प्रमोदकुमार चौबे यांना भेट दिला. तर हा मोदक विकत घेणाऱ्यांवर बाप्पाची वर्षभर कृपादृष्टी राहते, असा विश्वास यावेळी खाटूश्याम मित्र मंडळाचे अध्यक्ष प्रमोदकुमार चौबे यांनी व्यक्त केला.