Ambarnath News : बाप्पाच्या मोदकाचा २ लाख २२ हजारात लिलाव; आमदार पत्नीने लावली सर्वाधिक बोली

अंबरनाथ : गणेशोत्सव नुकताच पार पडला असून गणपती बाप्पाला मोदकांचा प्रसाद दिला जात असतो. अशाच प्रकारे अंबरनाथमध्ये गणपती बाप्पासमोरील दिलेल्या मोदक प्रसादाचा तब्बल २ लाख २२ हजार रुपयांना लिलाव करण्यात आला. अंबरनाथमधील खाटूश्याम मित्र मंडळाकडून करण्यात आलेल्या या लिलावात अंबरनाथचे आमदार डॉ. बालाजी किणीकर यांच्या पत्नी डॉ. शिल्पा किणीकर यांनी हि सर्वाधिक बोली लावत हा मोदक खरेदी केला.

अंबरनाथमधील (Ambarnath) खाटूश्याम मित्र मंडळाकडून बाप्पासमोर ठेवलेल्या महामोदकाचा विसर्जनाच्या दिवशी लिलाव करण्याची प्रथा आहे. साधारण मागील १५ वर्षांपासून हि परंपरा मंडळाकडून सुरु आहे. या लिलावात आज ६७ हजार रुपयांपासून बोली सुरू करण्यात आली. यावेळी अंबरनाथचे आमदार डॉ. बालाजी किणीकर यांच्या कुटुंबीयांनी देखील लिलावात सहभागी होत बोली लावली आणि सर्वाधिक २ लाख २२ हजार रुपयांची बोली लावत हा मोदक खरेदी केला. 

चौथ्यांदा बाप्पाचा आशीर्वाद नक्की मिळेल : डॉ. शिल्पा किणीकर

दरम्यान आमदार किणीकर यांना आत्तापर्यंत ३ वेळा अंबरनाथकरांनी आशीर्वाद दिला असून यंदाही बाप्पाच्या आशीर्वादाने ते चौथ्यांदा निवडून येतील; असा विश्वास आमदार किणीकर यांच्या पत्नी डॉ. शिल्पा बालाजी किणीकर यांनी व्यक्त केला. तर खाटूश्याम मंडळाचे प्रमोदकुमार चौबे यांनीही लिलावानंतर आमदार डॉ. किणीकर यांना शुभेच्छा दिल्या.