शिवसेना आपला गड राखणार? जिल्हा परिषद हातरुण पोटनिवडणुकीचा आज निकाल

अकोला : अकोला (Akola) जिल्हा परिषदेच्या (Zilla Parishad) हातरुण सर्कलसाठी काल 55.76 टक्के मतदान झाले. दरम्यान मतदानाची (Election) प्रक्रिया पूर्ण झाल्याने आज मतमोजणी करण्यात येणार आहे. बाळापूर येथील तहसील कार्यालयात ही मतमोजणी प्रक्रिया होणार आहे. त्यामुळे उमेदवारांच्या भाग्याच्या फैसल्यासाठी अवघ्या काही तासाचा अवधी उरला आहे. (Akola Latest Marathi News)

जिल्हा परिषदेच्या बाळापूर तालुक्यातील हातरूण सर्कलमधून निवडून आलेल्या शिवसेनेच्या (Shivsena) सदस्या सुनीता गोरे यांना विभागीय आयुक्तांनी अपात्र घोषित केल्यामुळे या सर्कलसाठी पोटनिवडणूक झाली. पोटनिवडणुकीत कॉंग्रेस, शिवसेना, भाजप व वंचितच्या उमेदवारांमध्येच थेट लढत पाहायला मिळाली. तर एक अपक्षही उमेदवार सुद्धा निवडणुकीच्या मैदानात होता.

या निवडणुकीत कोणत्या पक्षाचा उमेदवार विजयी होतो त्यावर जिल्हा परिषद मधील सत्ता समीकरण अवलंबून असल्याने ही निवडणूक सत्ताधारी वंचित व विरोधातील इतर पक्षांसाठी अतिशय महत्वाची मानली जात आहे. या सर्कलमध्ये 55. 76 टक्के मतदान झाले आहे.

हातरुणचा गड शिवसेना राखणार का?

हातरुण सर्कल मध्ये शिवसेनेच्या सुनीता गोरे ह्या निवडुन आल्या होत्या मात्र त्यांना अपात्र घोषित केल्याने येथे पोटनिवडणुक पार पडली. पोटनिवडणुकीत महाविकास आघाडीतील शिवसेना आणि राष्ट्रवादी काँग्रेस एकत्र लढत असून काँग्रेस, वंचित बहुजन आघाडी आणि भाजप स्वतंत्र लढत आहे. त्यामुळे या पोटनिवडणुकीत चौरंगी लढत पाहायला मिळाली आहे. दरम्यान शिवसेना हा गड राखणार की नाही. हे आजच्या निकालावर स्पष्ट होणार आहे. दरम्यान ही निवडणूक सेनेचे जिल्हाप्रमुख आमदार नितीन देशमुख यांच्या साठी प्रतिष्ठेची मानली जात आहे.

Edited By - Satish Daud