बातमी लावल्याचा राग! संपादकासह पत्रकारांवर प्राणघातक हल्ला, कोयत्यानं सपासप वार | Akola Crime

अक्षय गवळी, साम टीव्ही

अकोल्यातून एक धक्कादायक बातमी समोर येत आहे. बातमी लावण्याच्या रागातून पत्रकारांवर कोयत्यानं प्राणघातक हल्ला करण्यात आला आहे. पाच ते सहा तरूणांनी कोयत्यानं हल्ला चढवत जवळपास चार जणांना जखमी केलं आहे. ही धक्कादायक घटना जनता भाजी बाजारात घडली असून, सध्या जखमींवर खासगी रूग्णालयात उपचार सुरू आहेत. या घटनेनंतर परिसरात खळबळ उडाली आहे.

बातमी लावल्याच्या रागातून पत्रकारांवर प्राणघातक हल्ला चढवण्यात आला आहे. ही संतापजनक घटना अकोल्यातील जनता भाजी बाजारात घडली आहे. पाच ते सहा तरूणांनी मिळून कोयत्यानं हल्ला चढवत चार जणांना जखमी केलं आहे. अलिकडेच अकोला पोलिसांनी २ जणांना तडीपार केलं होतं.

यासंदर्भात त्यांच्याबाबत बातमी प्रकाशित करताच आरोपींना राग अनावर झाला. त्यांनी बातमी प्रकाशित करणाऱ्या पत्रकारांना शोधलं. तसेच बातमी लावल्याच्या रागातून हल्ला चढवला. अकोल्यातील एका स्थानिक वृत्तपत्रामध्ये तडीपार संदर्भात बातमी प्रकाशित केली होती, त्यावरून हा संपूर्ण वाद झाला असल्याची माहिती आहे.

लोकल वृत्तपत्राच्या संपादकासह चार जणांवर प्राणघातक हल्ला करण्यात आला. सर्व जखमींवर खासगी रुग्णालयात उपचार सुरू आहे. दरम्यान, या घटनेनंतर काँग्रेसचे आमदार साजिद खान पठाण घटनास्थळी दाखल झाले, तसेच अकोला पोलिसांवर ताशेरे ओढले. सध्या या घटनेनंतर परिसरात खळबळ उडाली आहे.