Akot Heavy Rain : अकोट तालुक्यात ढगफुटी सदृश्य पाऊस; शेतात पाणी साचल्याने नुकसान

अक्षय गवळी 

अकोला : मागील पंधरवड्यात जोरदार पाऊस झाल्यानंतर पावसाने विश्रांती घेतली होती. मात्र जिल्ह्यात पावसाने पुन्हा एकदा जोरदार हजेरी लावली असून अकोट तालुक्यातील काही भागात पुन्हा ढगफुटी सदृश्य पाऊस झाल्याचे पाहायला मिळाले. या पावसामुळे रस्त्यावर व शेतांमध्ये देखील पाणी साचले आहे. 

अकोला (Akola) जिल्ह्यातील अकोट तालुक्यात शनिवारी रात्री जोरदार पावसाचे आगमन झाले. शनिवारी मध्यरात्रीच्या सुमारास झालेल्या मुसळधार पावसानंतर रविवारी रात्री पुन्हा मुसळधार पाऊस (Heavy Rain) बरसला आहे. दरम्यान या पावसामुळे अकोट तालुक्यातल्या रुईखेड गावात अनेक घरांमध्ये पावसाचे पाणी शिरले आहे. त्यामुळे येथील ग्रामस्थांच्या प्रचंड हाल होत आहेत. रुईखेड गावात अनेकांच्या घरात पावसाचे पाणी शिरल्याने रात्रभर ग्रामस्थांचे हाल झाले. 

गावातील रस्त्यानं नदीचे स्वरूप 

दरम्यान आज पहाटे पावसाने विश्रांती घेतली, मात्र गावातल्या रस्त्यावर अक्षरशः पावसाचे पाणी वाहत झाले. या रस्त्याला जणू नदीचे स्वरूप आल्याचे दिसत आहे. तर शेत शिवारात देखील देखील मोठ्या प्रमाणात पाणी साचल आहे. त्याचा फटका पिकांना बसला असून त्यामुळे शेतकऱ्यांचं मोठं नुकसान होण्याची दाट शक्यता आहे.