Gondia Crime News : दारूच्या नशेत घरी येऊन घातला वाद; संतापलेल्या बापाने मुलाची केली हत्या, देवरी तालुक्यातील घटना

शुभम देशमुख 
गोंदिया : दारूचे व्यसन लागलेल्या मुलाचे व्यसन काही केल्या सुटत नव्हते. यात दारू पिऊन घरात वारंवार वाद घालत होता. सततच्या त्रासाला कंटाळलेल्या वडिलांनीच मुलाला जीवे मारल्याची धक्कादायक घटना गोंदिया जिल्ह्याच्या देवरी तालुक्या अंतर्गत येणाऱ्या मुल्ला गावात घडली आहे. 

हंसराज नारायण मुनेश्वर (वय ३२) असे घटनेत मृत झालेल्या तरुणाचे नाव आहे. हंसराजने आपल्या पत्नीला तिच्या (Gondia) माहेरगावी सालई येथे पाठविले होते. हंसराजला दारूचे व्यसन असल्यामुळे तो दारू पिऊन घरी मुल्ला येथे पोहोचला. यानंतर घरी पोहोचताच त्याने आई-वडिलांबरोबर भांडण सुरू केले. भांडण एवढे विकोपाला गेले की वडील व मुलामध्ये मारहाण झाली. यातच बाप- लेकाच्या (Crime News) हाणामारीत मुलाच्या डोक्यावर वडिलांने दगडाने मारहाण केली असता मुलाचा यात जागीच मृत्यू झाला.  

संशयित आरोपीला घेतले ताब्यात 

सदर घटनेची माहिती गावात समजल्यानंतर याची माहिती गावाकऱ्यांनी देवरी पोलिसांना दिली. यानंतर पोलीस घटनास्थळी दाखल झाल्यानंतर पंचनामा केला. यानंतर देवरी पोलिसांनी संशयित आरोपी बापाला ताब्यात घेत गुन्हा दाखल केला आहे.