Akola News : संतापजनक! निर्दयी बापाने 2 चिमुकल्या मुलींना नदीत फेकलं; मन सुन्न करणारी घटना, आरोपीला अटक

जन्मदात्या बापानेच पोटच्या 2 अल्पवयीन मुलींना नदीत फेकून दिल्याचा संतापजनक प्रकार अकोला येथील बाळापूर परिसरात घडला. शनिवारी (ता. ५) दुपारी घडलेल्या या घटनेमुळे संपूर्ण जिल्हा हादरून गेला. बचाव पथकाने रात्री उशिरापर्यंत दोन्ही मुलींचे मृतदेह पाण्याबाहेर काढले. आलिया आणि सदफ असं मृत्युमुखी पडलेल्या सख्खा बहि‍णींची नावे आहेत.

मृत मुलींच्या नातेवाईकांनीच म्हणजेच वडिलांनी हे कृत्य केल्याचा संशय देखील पोलिसांना आहे. त्या आधारावर पोलिसांनी संशयिताला ताब्यात घेतलं आहे. शेख हारून असं आरोपीचं नाव आहे. मिळालेल्या माहितीनुसार, दोन्ही बहिणी आपल्या वडिलांसोबत आधार कार्ड अपडेट करण्यासाठी घरातून निघाल्या होत्या. बराच वेळ होऊन त्या घरी परतल्या नाहीत.

मुलींना अटाळी येथून ऑटो रिक्षात बसून दिले होते, असा बनाव मुलींच्या वडिलांनी कुटुंबियांसमोर केला. अखेर कुटुंबियांनी मुली बेपत्ता असल्याची तक्रार हिवरखेड पोलिसांत दाखल केलेली होती. मात्र पोलिसांनी शेख हारून यावरच शंका आल्याने त्याला ताब्यात घेऊन चौकशी करण्यात आली.

पोलिसी खाक्या दाखवताच आरोपीने आपल्या मुलींना नदीत फेकल्याची माहिती पोलिसांना दिली आहे. तपासादरम्यान वडिलांनी मुलीला पुलावरून नदीत फेकून दिलाचा प्रकार समोर आला आहे. पोलिसांनी बचावपथकाच्या मदतीने रात्री उशिरापर्यंत दोन्ही मुलींचे मृतदेह बाहेर काढले. याप्रकरणी निर्दयी बापाविरोधात गुन्हा दाखल करण्यात आला आहे.