Akola Crime : अकोल्यात किरकोळ कारणावरून चाकू हल्ला; दोन घटनात ५ जण जखमी, एकाची प्रकृती चिंताजनक

अक्षय गवळी 
अकोला : अकोल्यात चाकू हल्ल्याच्या दोन वेगवेगळ्या घटना समोर आल्या आहेत. यातील एक घटना अकोला रेल्वे स्टेशन परिसरात घडली. तर दुसरी घटना  एमआयडीसी पोलीस स्टेशन हद्दीत देखील शिवनी परिसरात घडली आहे. यात थेट चाकू हल्ला करण्यात आला होता. दोन्ही घटनांमध्ये मिळून पाच जण जखमी झाले असून यातील एकाची प्रकृती चिंताजनक असल्याचे सांगितले जात आहे. या प्रकरणी पोलिसांकडून तपास सुरु आहे. 

अकोल्याच्या रेल्वे स्थानकावर गाडी जप्ती करण्याची कारवाई सुरु होती. गाडी जप्तीवरून काहींनी गोंधळ घालण्यास सुरवात केली. यात काही जणांनी चाकू हल्ला केला. या चाकू हल्ल्यात चार जण गंभीर जखमी झाले असून यामध्ये एकाची प्रकृती चिंताजनक आहे. अकोल्याच्या रेल्वे स्थानक परिसरात गाडी जप्तीवरून वाद उफाळून आला होता. या वादात पाच तरुणांनी चाकूहल्ला करीत चौघेजण गंभीर जखमी केले. 

पोलिसांकडून तपास सुरु 

रेल्वे स्टेशन परिसरात झालेल्या वादातून झालेल्या चाकूहल्ल्यात इरफान अहमद याची प्रकृती गंभीर असल्याचे समजते. तर झिया अहमद सईद अहमद, फैजान अहमद झिया अहमद, इरफान अहमद सईद अहमद आणि इमरान अहमद जाफर अहमद हे जखमी झाले आहेत. या सर्वांवर अकोल्याच्या शासकीय रुग्णालयात उपचार सुरू आहेत. या प्रकरणात रामदास पेठ पोलीस अधिक तपास करत आहेत. 

तिघांकडून तरुणावर हल्ला 
दरम्यान, एमआयडीसी पोलीस स्टेशन हद्दीत देखील शिवनी परिसरात दुसरी घटना घडली. यात तिघांनी एकावर चाकू हल्ला करीत गंभीर जखमी केले आहे. या हल्ल्यात एजाज खान हा जखमी झाला आहे. राहुल डोंगरे, मंगेश मेहेंगे आणि शुभम जगदाळे या तिघांनी मिळून एजाज खान याच्यावर चाकू हल्ला केला. शुल्लक कारणांवरून हा चाकू हल्ला झाल्याचा समजते. अकोला घडलेल्या दोन चाकू हल्ल्याच्या घटनेमुळे पोलिसांच्या कार्यक्षमतेवर प्रश्न उपस्थित होत आहे.