Maharashtra Politics : अजित पवारांना मोठा धक्का; बीडमधील बडा नेता भाजपच्या वाटेवर, राजकीय समीकरण बदलणार

योगेश काशिद, साम टीव्ही

स्थानिक स्वराज्य संस्थांच्या निवडणुकींच्या पार्श्वभूमीवर राजकीय घडामोडींना वेग आला आहे. निवडणुकीच्या तोंडावर अनेक नेते पक्षांतर करताना दिसत आहेत. बीडमध्येही निवडणुकीची रणधुमाळी पाहायला मिळत आहे. बीडमधील बडा नेता भाजपच्या गाळाला लागल्याची माहिती मिळत आहे. अजित पवार गटाचे महत्वाचे नेते हे भाजपच्या वाटेवर असल्याची माहिती सूत्रांनी दिली आहे. या नेत्याच्या पक्षांतराच्या भूमिकेने बीडमध्ये भाजपची ताकद वाढण्याची शक्यता व्यक्त करण्यात येत आहे.

बीडमध्ये अजित पवार गटाला मोठा धक्का बसण्याची शक्यता आहे. योगेश क्षीरसागर भाजपच्या वाटेवर असल्याची माहिती हाती आली आहे. नगर परिषदेमध्ये आमदार विजयसिंह पंडित यांनी हस्तक्षेप केल्याने योगेश क्षीरसागर यांनी भाजपमध्ये जाण्याचा निर्णय घेतल्याचे बोललं जात आहे. मंत्री पंकजा मुंडे यांच्या नेतृत्वात बीड नगर परिषदेची निवडणूक योगेश क्षीरसागर लढणार असल्याची माहिती सूत्रांनी साम टीव्हीला दिली. योगेश शिरसागर यांनी अजित पवार गटाकडून बीडची विधानसभेची निवडणूक लढवली होती.

बीडमध्ये अजित पवारांच्या घड्याळाला तडे

बीडमध्ये मोठमोठ्या राजकीय घडामोडी घडताना पाहायला मिळत आहे. बीड नगर परिषदेमध्ये नेतृत्वाच्या संघर्षामध्ये राष्ट्रवादी अजित पवारांची घड्याळाला तडे जाताना पाहायला मिळत आहे. गेवराईचे आमदार विजयसिंह पंडित यांनी बीड नगर परिषदेमध्ये हस्तक्षेप केल्याने योगेश क्षीरसागर नाराज असल्याची चर्चा आहे.

योगेश क्षीरसागर यांनी अजित पवारांच्या राष्ट्रवादीला धक्का देत भाजपमध्ये प्रवेश करण्याचे ठरवल्याची माहिती सूत्रांनी दिली आहे. योगेश क्षीरसागर हे भाजपमध्ये प्रवेश करून नगरपरिषदेची निवडणूक मंत्री पंकजा मुंडे यांच्या नेतृत्वाखाली लढणार असल्याची माहिती सूत्रांनी दिली आहे. त्यामुळे बीडमधील राजकारणात चर्चांना उधाण आलं आहे.