Political News : महायुतीच्या मेळाव्याला भाजपच्या कोल्हेंची गैरहजेरी; विखेंसोबत एकाच मंचावर येण्याचे टाळले

सचिन बनसोडे

Lok Sabha Election :

अहमदनगर दक्षिण लोकसभा मतदारसंघात राम शिंदे यांची नाराजी दूर करण्यात सुजय विखे पाटलांना यश आलंय. शिर्डी मतदारसंघात मात्र विखे पाटील आणि कोल्हे या एकाच पक्षात असणाऱ्या राजकीय विरोधकांचे सुत मात्र जुळत नसल्याचे चित्र पुन्हा एकदा समोर आलेय.

काल सायंकाळी महायुतीचे उमेदवार खासदार सदाशिव लोखंडे यांच्या प्रचारासाठी कोपरगाव शहरात मेळावा पार पडला. या मेळाव्यासाठी राष्ट्रवादी अजित पवार गटाचे आमदार आशुतोष काळे उपस्थित होते. भाजपच्या माजी आमदार स्नेहालता आणि त्यांचे पुत्र विवेक कोल्हे यांनी मात्र या मेळाव्याकडे पाठ फिरवली.

एकाच पक्षात असून गेल्या काही महिन्यांपासून कोल्हे आणि विखे यांच्यात राजकीय संघर्ष सुरू आहे. त्यामुळेच कोल्हे यांनी विखे पाटलांसोबत एकाच मंचावर येण्याचे टाळले असल्याचे बोलले जातेय.

महायुतीच्या या मेळाव्यात विखे पाटील यांनी राष्ट्रवादीचे आमदार आशुतोष काळे यांचे तरुण आमदार असा उल्लेख करत कौतुक केलंय. तर नगर दक्षिणच्या जागेवरून विखे पाटलांनी निलेश लंकेंना भाषणातून टोला लगावलाय.