Karad: 'यशवंतराव पतसंस्था' अवसायनात, इंद्रजीत मोहिते परदेशात; कराडसह वाळवातील शेतकऱ्यांच्या पैशांचे काय?

Karad News :

कराड तालुक्यातील रेठरे बुद्रुक येथील यशवंतराव मोहिते नागरी सहकारी पतसंस्था (Yashwantrao Mohite Nagari Sahakari Patsanstha) आर्थिक अडचणीत असल्याची चर्चा गेले अनेक दिवस सुरु होती. त्यातच या संस्थेवर अवसायक नेमण्याचा आदेश सहकारी संस्थाचे विभागीय सहनिबंधक अरुण काकडे यांनी काढला आहे. (Maharashtra News)

या संस्थेच्या 14 शाखा आहेत. एकूण 34 कोटीच्या ठेवी आहेत. कराड आणि वाळवा तालुक्यातील शेतकऱ्यांचे पैसे या संस्थेत आहेत, मात्र गेल्या काही महिन्यापासून ठेवी परत दिल्या जात नसल्याची तक्रार होती. अखेर या संस्थेवर अवसायक नेमण्याचा आदेश सहकारी संस्थाचे विभागीय सहनिबंधक अरुण काकडे यांनी काढला आहे.

या संस्थेचे लेखापरीक्षण तीन वर्ष केलेलं नाही तसंच अगोदर केलेल्या लेखापारीक्षणातही त्रुटी आढळल्या आहेत. या कारणाने अवसायक नेमण्याचा निर्णय घेण्यात आला आहे. लेखापरीक्षक कमलेश पाचपुते यांना आवसायक म्हणून नेमले आहे. आता अवसायक नेमल्याने ठेवीदारांचे धाबे दणाणले आहेत. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

यशवंतराव मोहिते यांनी सहकार मंत्री असताना सहकारात शिस्त रहावी म्हणून अनेक कायदे केले, मात्र त्यांच्याच नावाने असलेल्या संस्थेत आर्थिक शिस्त न पाळल्याने संस्था अडचणीत आली आहे. या संस्थेचे संस्थापक डॉ. इंद्रजीत मोहिते (dr indrajeet mohite) मात्र संस्था अडचणीत असताना परदेशवारीवर गेले आहेत. त्यामुळे लोकांमधून संताप व्यक्त होत आहे.

Edited By : Siddharth Latkar