परतीच्या पावसाने सोयाबीनची माती, तरुण शेतकऱ्याने उचललं टोकाचं पाऊल; ऐन दिवाळीत संसार उध्वस्त

बीड : शेतात लावलेलं सोयाबीन परतीच्या पावसाने मातीमोल झालं, तब्बल 2 एक्कर मध्ये सोयाबीनच्या लागवडीसाठी केलेली मशागत बियानाचे पैसे आणि ऐन दिवाळीत जेव्हा सोयाबीन (Soybeans) विकून घेतलेली कर्ज फेडायची वेळ आली त्याच वेळी परतीच्या पावसाने घात केला आण सर्व सोयाबीनचा अक्षरश: डोळ्यासमोर चिखलात गेलं.

त्यामुळे आता घेतलेलं कर्ज कसं भागवायचं ? या विवंचनेतून एका 31 वर्षीय तरुण शेतकऱ्याने (Farmer) आत्महत्या केल्याची दुर्दैवी घटना बीडच्या (Beed) केज तालुक्यातील जोला या गावात घडली आहे. तर आमचं 2 एकर सोयाबीन गेलं म्हणून त्यांनी टोकाचे पाऊल उचललं म्हणत आत्महत्या केलेल्या शेतकऱ्याच्या पत्नीने एकच टाहो फोडला, त्यामुळे ऐन तरण्याबांड शेतकऱ्याने केलेल्या आत्महत्येमुळे कुटुंबार दु:खाचा डोंगर कोसळला असून संपुर्ण गावावर शोककळा पसरली आहे.

पाहा व्हिडीओ -

मिळालेल्या माहितीनुसार, गणेश मारोती सारूक वय 31 रा. जोला ता. केज असं आत्महत्या केलेल्या तरुण शेतकऱ्याचे नाव आहे. गणेश सारूक यांची 2 एक्कर सोयाबीन पेरली होती. मात्र अतिवृष्टीने पुरतं सोयाबीन वाया गेलं. त्यामुळे सेवा सहकारी सोसायटीसह इतर खाजगी घेतलेलं कर्ज कसं फेडाव ? या नैराश्यातून कर्जबाजारीपणाला कंटाळून गणेश सारूक यांनी स्वतःच्या शेतातील लिंबाच्या झाडाला गळफास घेऊन आत्महत्या केली.

घटनेची माहिती मिळताच केज पोलिस घटनास्थळी दाखल झाले. दरम्यान बीड जिल्ह्यात दिवसेंदिवस शेतकरी आत्महत्याच्या घटनेत वाढ होत आहे. गेल्या आठवड्यात पाच दिवसात पाच शेतकऱ्यांनी आत्महत्या करत आपले जीवन संपवले.

मात्र, सरकार आणि निगरगट्ट प्रशासनाने आत्तापर्यंत शेतकऱ्यांना कसलाही आधार दिलेला नाही. या अतिवृष्टीच्या खाईत शेतकरी हतबल झालाय. त्यामुळे या शेतकऱ्यांना धीर आणि आधार देण्याची गरज आज निर्माण झाली आहे. त्यामुळे आता सरकार आणि प्रशासन या शेतकऱ्यांना आधार देणार का ? असा सवाल गावकरी उपस्थित करत आहेत.