Shahapur News : गॅस्ट्रोलचा प्रादुर्भाव वाढला! ४ वर्षीय चिमुकलीचा मृत्यू, अनेक रुग्णांची प्रकृती गंभीर

नाशिकमधील शहापूर तालुक्यातून धक्कदायक बातमी समोर आली आहे. तालुक्यात गॅस्ट्रोलने एका ४ वर्षीय चिमुकलीचा मृत्यू झाला आहे. शिवाय अजून २ जण गंभीर असल्याचे वृत्त आहे. या घटनेने परिसरात भीतीचे वातावरण निर्माण झाले आहे. दरम्यान हे कशामुळे होत आहे याचं कारण समोर आलेलं नाही.

मिळालेल्या माहितीनुसार, शहापूर तालुक्यातील शिरोळ ग्रामपंचायत मधील फणसपाडा येथे अनेक नागरिकांना गॅस्ट्रोलची लागण झाली आहे. या रुग्णांना उपचार करण्यासाठी वेगवेगळ्या रुग्णालयात पाठवण्यात आले आहे. या रुग्णांमध्ये असलेल्या ४ वर्षीय चिमुकलीची प्रकृती गंभीर झाल्याने तिला ठाणे येथील रुग्णालयात रेफर करण्यात आले. चिमुकलीच्या कुटुंबीयांनी तिला घेऊन ठाण्याकडे निघाले असता वाटेतच चिमुकलीचा मृत्यू झाला.

या चिमुकलीसोबतच आनिता बाळू भगत वय ३२ यांची प्रकृती चिंताजनक असून त्यांना देखील ठाणे येथील रूग्णालयात पाठवण्यात आले आहे. त्याचबरोबर प्रकाश पारधी या रुग्णाला प्रकृती गंभीर असल्याने उपचारासाठी मुंबई येथे पाठवण्यात आले आहे. गेल्या दोन दिवसांपासून शहापूर तालुक्यातील शिरोळ ग्रामपंचायतील फणसपाडा येथे विहीरीचा पाणी पिण्यासाठी वापरत होते. यामुळे ही लागण झाल्याचे प्राथमिक माहिती मिळाली आहे.

नागरिकांना त्रास होत असल्याने दोन दिवस कॅम्प लावला असला तरी तंज्ञ डॉक्टरांची नेमणूक केली गेली नाही. केवळ उपकेंद्रातील डॉक्टर वर या कॅम्पचा भार दिल्याने तालुका आरोग्य विभागा मार्फत जी सुविधा उपलब्ध करून देणे गरजेचे होते, ती सुविधा उपलब्ध न झाल्याने रूग्णांची संख्या दिवसेंदिवस वाढत आहे. दरम्यान रूग्णांवर फनसपाडा कॅम्प मध्ये तंज्ञ डॉक्टर नसल्याने उपचारासाठी रूग्णांना दुसरीकडे पाठवण्यात येत असल्याने अनेक रूग्णांचे मोठ्या प्रमाणात हाल होत आहेत. अशा परीस्थीत अनेकांचे प्राण जाण्याची शक्यता आहे.